Афганистаны өмнөд хэсгийн Гильменд мужид цэргийнхний явуулсан ажиллагааны үеэр олон тооны энгийн иргэд амь үрэгджээ. Түүнчлэн арав гаруй хүн шархадсан байна. Энэ тухай орон нутгийн албан тушаалтан мэдээлжээ. Түүний ярьснаар “Талибан” хөдөлгөөний амиа золиослогчдыг бэлтгэх төв рүү Засгийн газрын цэргүүд дайрах үеэр тэр хавьд хурим болж байжээ. “35 энгийн иргэн амь үрэгдэж, 13 хүн шархадсан. Тэдгээр хүмүүс цэргүүд дайралт хийсэн барилгын дэргэд хуриманд цугларсан байсан” гэж Гильменд мужийн зөвлөлийн гишүүн Атаулла Афган мэдээлэв. Зөвлөлийн бас нэгэн гишүүн Абдул Маджид Ахундзадагийн хэлснээр дайралтын улмаас 40 гаруй энгийн иргэн амиа алдсан гэнэ.

Харин АНУ-ын цэргийнхэн ажиллагааны үеэр Талибаны 22 хэт даврагчийг устгасан хэмээн мэдэгджээ. Харин Гильменд мужийн захирагчийн албаны төлөөлөгч Омар Звак 14 хэт даврагч, түүний дотор гадаадын зургаан иргэн алагдсан гэв. Тэрбээр энгийн иргэд амь үрэгдсэн тухай мэдээлэл шалгагдаж байгаа талаар дурджээ.

Хоёр долоо хоногийн АНУ-ын Ерөнхийлөгч Дональд Трамп Кэмп-Дэвид дэх өргөөндөө Афганистаны “Талибан” хөдөлгөөний удирдагчидтай хийх гэж байсан хэлэлцээрээс татгалзсан. Вашингтон Афганистанд 2001 оноос эхэлсэн дайныг зогсоохын тулд “Талибан” хөдөлгөөнтэй Катарт хэлэлцээр явуулаад байсан. Афганистаны ихэнх хэсэгт хяналтаа тогтоосон “Талибан” хөдөлгөөн тус улсаас гадаадын цэргүүдийг бүрэн гаргахыг шаардаж буй. НҮБ-ын мэдээлснээр энэ оны эхний хагаст Афганистанд халдлагын улмаас 3800 хүн амь үрэгдэж, шархдаад байгаа аж.