Якутаас Москва руу “В.Путиныг зайлуулах”-аар явсан бөө Александр Габышевын хамсаатан дөрвөн хүнийг Эрхүү хотноо саатуулан баривчиллаа гэж “Коммерсант “хэвлэл нийтэлсэн байна. “Хүний эрхийг нээлттэй хамгаалагч” байгууллагын зохицуулагч Алексей Прянишниковын хэлснээр бол Евгений Ростокин болон түүний гурван нөхрийг саатуулсан шалтгаан нь зодолдоод байна гэсэн хөршийнх нь мэдээллээр баривчилсан гэж байгаа ч үнэн хэрэг дээрээ хууль зөрчсөн ямар нэг үйлдэл болоогүй гэнэ. “В.Путиныг зайлуулна” хэмээн Москваг зорьж явсан Якутын бөө Александр Габышевийг есдүгээр сарын 19-нд Буриадын цагдаа нар баривчилсан юм. Шөнө хоноглохоор Буриад, Эрхүү мужийн хил орчим буудаллаад байхад нь түүнийг саатуулжээ. Хожим нь мэдэгдсэнээр түүнийг сэтгэл мэдрэлийн эмнэлэгт хүргэсэн ч түүнээс ямар нэг эмгэг өвчин илрээгүй байна. Үүнээс өмнө есдүгээр сарын 12-нд энэ бөөгийн эсрэг “хэт даврагч үйл ажиллагаанд турхирсан” хэмээн эрүүгийн хэрэг үүсгээд Якутын тусгай албаныхан түүнийг улсынхаа нутаг дэвсгэрээс гарч явахгүй байх гарын үсэг аваад байсан юм.