Йемений босогчдын “Ансар Аллах” хөдөлгөөний дайчид Саудын Арабын Нажран хот, хилийн бүсэд явуулсан цэргийн ажиллагааныхаа явцад өнгөрсөн хэдэн сарын дотор Саудын Арабын хэдэн мянган цэрэг офицерыг олзлон авсан гэж Хуситын зэвсэгт хүчний албан ёсны зохицуулагч генерал Яхья Сари босогчдын телевзээр ярихдаа мэдэгджээ. “Бурхны ялалт нэртэй байлдааны томоохон ажиллагаа Нажраны чиглэлд явууллаа. Дайсны эсрэг хамгийн том ажиллагаа нь 2015 онд эхэлж хэдэн сар үргэлжилсний эцэст бид тэдний гурван бригадыг бүрэн устгаж, тээврийн хэдэн зуун хэрэгсэл, хуягт машин, хэдэн мянган хүнийг олзолсны дотор саудын армийн командлах бүрэлдэхүүний хэмжээний офицер олон байна” гэж Сари хэлсэн байна. Зохицуулагчийн үгээр бол хуситууд ойрын үед байлдааны шинэ ажиллагаа эхлэх юм байна. 

Йемений Засгийн газар болон, хуситын босогчид, шийтийн “Ансар Аллах” хөдөлгөөний хоорондох цэрэг улс төрийн зөрчилдөөн 2014 оноос эхлэн өнөөг хүртэл үргэлжилж байгаа юм. Саудын Араб тэргүүтэй Арабын орнуудын эвсэл 2015 оны гуравдугаар сараас эхлэн Йемений Засгийн газрыг дэмжин байлдаж байгаа юм. 2018 оны арванхоёрдугаар сард сөргөлдөгч талууд анх удаагаа НҮБ-ын ивээл дор Стокгольмд хэлэлцээрийн ширээнд суусан. Тэр үеэр олзлогдогсдыг солилцох, Улаан тэнгисийн эрэг дээрх Ходейде боомт хотод гал зогсоож НҮБ-ын хяналтад өгөх гэсэн хоёр чухал тохиролцоонд хүрсэн юм.