БНХАУ байгуулагдсаны 70 жилийн ойд зориулсан баярын ажиллагаа мягмар гарагт орон нутгийн цагаар өглөөний 10.00 цагт Бээжингийн төв Тяньаньмэний талбайд эхэллээ гэж дэлхийн хэвлэлүүд мэдээллээ. Хаалттай хот руу ордог хаалганы өмнөх индэр дээр БНХАУ-ын дарга Си Зиньпин, Төрийн зөвлөлийн дарга Ли Кэцян, нам төрийн бусад удирдлага, өмнө нь төрийн тэргүүн байсан Зян Зэминь нар гарсан байна.
Баярын ажиллагаа нээснийг Төрийн зөвлөлийн дарга Ли Кэцян зарласны дараагаар их буугаар 70 удаа хүндэтгэн буудаж, Хятадын Ардын чөлөөлөх армийн хүндэт харуулын салаа БНХАУ-ын далбааг төв талбайд залан авчирч мандуулан үлээвэр найрал хөгжим төрийн дуулал эгшиглүүлжээ.

Бээжин дэх цэргийн парад

Үүний дараа БНХАУ-ын дарга улс байгуулагдсаны 70 жилийн ойд зориулсан цэргийн парад эхлүүлэх тушаал өгсөн байна. Төрийн тэргүүн “дайчид парадын жагсаалаар” гэж командалсны дараа Си Зиньпин өөрийн “Хунци” (Улаан туг) лимузинээр Бээжингийн төвийн Чанъаньзе дүүрэгт жагссан батальонууд, техникийн хэсэгт очиж мэндчилсэн. “Маозэдуны” хэмээн нэрийддэг хар саарал китель өмссөн Си Зиньпин “Сайн байцгаана уу, нөхдөө” хэмээн мэндчлэхэд дайчид “нөхөр даргын амрыг эрье” хэмээн хариу барьсан байна. Парадад Ардын чөлөөлөх армийн эмэгтэй дайчид цагаан, хөх, улаан дүрэмт хувцастай оролцож байна.

БНХАУ байгуулагдсаны 70 жилийн ойд зориулсан цэргийн парадад нийт 15 мянган цэрэг дайчид, 580 нэгж байлдааны техник, 160 нисэх онгоц, нисдэг тэрэг оролцжээ. Цэргийн парад өндөрлөсний дараа хотод баярын жагсаал болж 100 мянга гаруй хүн оролцсон аж. Төрийн энэ баярыг тохиолдуулан хятадууд 70 мянган тагтаа, мөн төдий хэмжээний агаарын бөмбөлөг хөөргөжээ.

Хятадын коммунист намын тэргүүн, БНХАУ-ын дарга Си Зиньпин баярын өмнөхөн даваа гарагт өндөр албаны түшмэлүүдийн хамт БНХАУ-ыг үндэслэгч Мао Зэдуны бунханд, Тяньаньмэнийн талбай дах ардын баатруудын хөшөөнд цэцэг өргөж хүндэтгэл үзүүлсэн юм. Си Зиньпин дарга Мао Зэдуны бунханд гурвантаа мэхийн хүндэтгэл үзүүлсэн гэж мэдээллийн “Синьхуа” агентлаг дамжуулжээ.