Өчигдөр аравдугаар сарын 2-ны лхагва гарагт БНАСАУ Япон тэнгисийн зүг хоёр ч балластик пуужин хөөргөсний нэг нь японы эдийн засгийн бүсийн заагт уналаа гэж Токиод хийлгэсэн хэвлэлийн бага хурал дээр Японы Сайд нарын танхимын ерөнхий нарийн бичгийн дарга Ёсихидэ Суга мэдэгдсэн байна. “Умард Солонгос өнөөдөр өглөөгүүр хоёр баллистик пуужин харвалаа. Үүний нэг нь Япон тэнгист манай Симанэ аймгийн нутаг эдийн засгийн бүсийн хил орчим унасан байна. Загас агнуурын хөлөг онгоцнуудад ямар нэгэн хохирол учирсан тухай мэдээлэл одоохондоо алга. Бид мэдээлэл цуглуулж байна” гэж тэр хэлжээ. Өмнөд Солонгосын Штабын дарга нарын хорооны мэдээлснээр бол Умардынхан пуужингаа зүүн нутгийн Вонсон боомтын районоос хөөргөсөн юм байна. 

Үүнтэй холбоотойгоор Япон улс Үндэсний аюулгүй байдлын зөвлөлийн хуралдаан зарлаж эндээ Ерөнхий сайд Синзо Абэ, Гадаад хэргийн болон Батлан хамгаалахын сайд нараа оролцуулан хуралдлаа гэж Суга мэдэгджээ. “Бид Үндэсний аюулгүй байдлын зөвлөлийн хуралдаанаар Умард Солонгосын харвасан пуужинг тойрсон асуудал болон цаашид авах арга хэмжээний талаар ярилцсан. Ерөнхий сайд Абэ бүхий л талын мэдээлэл цуглуулахаас гадна, тэнгисийн болон агаарын хөлгүүдийн аюулгүй байдлыг хангах арга хэмжээ авахыг даалгалаа” гэж Суга мэдэгдсэн байна. БНАСАУ энэ оны долдугаар сараас эхлэн ойрын тусгалтай баллистик пуужин харван туршиж эхэлсэн. Зөвхөн наймдугаар сард л гэхэд Пеньян таван ийм туршилт хийсэн юм.