Кашмир муж дахь нөхцөл байдал хурцадсанаас Пакистан улс хөрш Энэтхэгтэй цөмийн дайн эхлүүлж магадгүй болоод байна хэмээн дэлхий дахины хамтын нийгэмлэгт урьдчилан анхааруулж байна хэмээн Кашмир мужийн пакистаны хэсгийн удирдагч Масуд Хан мэдэгдсэнийг оросын РИА Новости агентлаг дамжуулжээ. Цэргийн энэ хязгаарлагдмал сөргөлдөөн цөмийн дайн болж өргөжих магадлал байна гэж Хан мэдэгдсэн байна. Гэхдээ Пакистан дайн эхлүүлэхийг оролдохгүй, харин нөхцөл байдал хурцдаад ирэхэд олон улсын хамтын нийгэмлэгийн зүгээс Энэтхэгт шахалт үзүүлэхийн тулд, тэдний хууль бус үйлдлийг хязгаарлуулахын тулд Пакистан “тодорхой арга хэмжээ” авч мэднэ гэжээ. Цэргийн энэ сөргөлдөөн нь бусад улс орнуудыг оролцуулахад хүргэхгүй, харин Энэтхэг Пакистаны энэ дайн “хурдан, аймшигтай” байх болно гэж Хан хэлсэн байна. “Энэ дайн үхлийн аюултай дайн болно. Жинхэнэ армагеддон гэсэн үг. Өмнөд Азид хэдэн зуун сая хүний амь үрэгдэж, цацраг идэвхт бодис нь манай гаргийн 2.5 тэрбум хүнд нөлөөлнө” гэж Хан онцлон тэмдэглэжээ. 

Ингээд Кашмир мужийн Пакистанд хамаардаг нутгийн тэргүүн Хан олон улсын хамтын нийгэмлэг, НҮБ-ын Аюулгүйн зөвлөлийг нөхцөл байдлыг эерэг байдал руу чиглүүлэхэд нөлөөлөхийг уриалсан байна. Өнгөрсөн наймдугаар сарын 5-нд Энэтхэгийн засгийн газар Жамм болон Кашмир мужийг татан буулгаж тэнд холбооны хоёр нутаг дэвсгэр байгуулах шийдвэр гаргасан юм. Пакистан үүний хариуд дотоод хэрэгт нь Энэтхэг оролцож байгааг буруутгасан. Пакистаны Ерөнхий сайд Имран Хан үүнтэй холбогдуулан Энэтхэгтэй цэргийн мөргөлдөөнд хүрэх эрсдэл бий боллоо гэж мэдэгдсэн юм.