Өмнөд Солонгосын Samsung корпорац Хятад дахь гар утасны үйлдвэрлэлээ зогсоохоор шийвэрлэлээ хэмээн мэдэгдсэнийг мэдээллийн Reuters агентлаг дамжуулсан байна. Хятад дахь эдийн засгийн уналт, дээр нь нутгийн гар утас үйлдвэрлэгчдийн өрсөлдөөн нэмэгдсэнээс ийм шийдэлд хүрлээ гэсэн байна. Samsung корпорацын гар утасны үйлдвэр Гуандун мужийн Хуэйжоу хотод байдаг юм. Энэ оны зургадугаар сард Samsung Хятад дахь үйлдвэрлэл, ажилтныхаа тоог цөөлөхөө мэдэгдэж байсан юм. Хятадад байсан бусад гар утасны үйлдвэрүүдээ Samsung өмнөх 2018 онд зогсоосон. Counterpoint компанийн судалгаагаар Samsung-ийн Хятадын зах зээлд эзлэх хувь нэг хувь болтол буурсан юм байна. Гэтэл 2013 онд энэ үзүүлэлт 15 хувь байжээ. Cape Investment & Securities-ийн шинжээч Пак Сун-Скорын үзэж байгаагаар бол Samsung Хятадын зах зээлд эзлэх хувиа сэргээнэ гэдэг тун магадлал муутай гэнэ. Хятадын хэрэглэгчид эх орны үйлдвэрийнхээ хямд гар утас юм уу, үнэтэйгээс Apple, Huawei утас худалдан авах нь ихэссэн гэж тэр хэлжээ. 

Sony корпорац бас энэ оны гуравдугаар сард Хятад дахь үйлдвэрлэлээ зогсоож байгаагаа мэдэгдээд гар утасны үйлдвэрээ зөвхөн Тайландад ажиллуулахаа мэдэгдсэн. Apple бас Хятад дахь үйлдвэрлэлийнхээ 15-30 хувийг Тайланд руу нүүлгэн шилжүүлэх боломжийг судалж байна гэж Nikkei энэ зургадугаар сард мэдээлж байсан. Тэднийх бас Вьетнам, Энэтхэг, Мексик, Индонези, Малайзад үйлдвэрлэл нээх боломжийг судалж байгаа юм байна.