2020 онд болох АНУ-ын Ерөнхийлөгчийн сонгуульд орос нөлөөлөх үү гэсэн асуултад ОХУ-ын Ерөнхийлөгч Владимир Путин “Маш нууцаа танд дэлгэхэд дараа нь баярлаж хөгжилдөхийн тулд бид үүнийг заавал хийнэ” гэж тоглоом шоглоом хийжээ. Дараа нь төрийн тэргүүн “Ганцхан үүнийг хэнд ч битгий хэлээрэй. За юу” гэсэн байна.

ОХУ-ын Ерөнхийлөгч ингэж тоглоом хийсний дараа АНУ-ын Дотоодын аюулгүй байдлын яамны бүтцэд ордог Дэд бүтэц, кибер аюулгүй байдлын агентлагийн захирлын туслах Жанет Мэнфра “2020 оны Ерөнхийлөгчийн сонгуульд Оросыг нөлөөлүүлэхгүй байх бүхий л төрлийн багаж төхөөрөмж, бүтэц бий” гэж мэдэгдсэнийг “Америкийн дуу хоолой” радио станцын сэтгүүлч Жефф Сэлдин лхагва гарагт Twitter хуудсаараа дамжуулжээ.

Кибер аюулгүй байдлын асуудлаар аравдугаар сарын 2-нд хийлгэсэн хэвлэлийн бага хурал дээр Мэнфра сонгуулийн дэд бүтцэд кибер халдлага хийх ямар нэг тодорхой аюул АНУ-д өнөөдөртөө алга байна гэж мэдэгдсэн юм. Тэрээр “Одоохондоо ийм аюул бидэнд харагдахгүй байна. Тэгээд ч бидэнд саад болох вирусны программ орж ирэхийг хориглох арга хэрэгсэл, тодорхой хөтөлбөр, өөрийн компьютерийн системээ шинэчлэх нөөц хувилбар бий” гэж хатагтай Мэнфра ярьжээ.

АНУ-ын 2016 оны Ерөнхийлөгчийн сонгуульд Орос хөндлөнгөөс нөлөөлсөн гэж Америкийн тусгай алба буруутгадаг юм. Үнэхээр ийм нөлөөлөл байсан уу, үгүй юү гэдгийг АНУ-ын тусгай прокурор Роберт Мюллер мөрдөн шалгасан. Энэ шалгалтын дүнгийн тухай илтгэлийг АНУ-ын Хууль зүйн яам энэ оны дөрөвдүгээр сарын 18-нд сонсох үеэр тусгай прокурор сонгуулийн үеэр Дональд Трамп Оростой ямар нэгэн яриа хэлэлцээр хийгээгүй нь тогтоогдлоо гэсэн юм.

Дональд Трамп ч гэсэн өөрөө сонгуулийн кампанийнхаа үеэр Оросын албаны хүмүүстэй ямар нэг хууль бус холбоо харилцаа байгаагүй хэмээн энэ яриаг нэг бус удаа няцаадаг юм. Москва ч гэсэн Америкийн Ерөнхийлөгчийн сонгуульд нөлөөлөх зорилгоор ямар нэг үйлдэл, оролдлого хийгээгүй хэмээн няцаасаар өнөө хүрч байгаа юм.