Хөлөг онгоц нь Японы эдийн засгийн бүсэд нэвтэрч загас агнуурын хөлөгтэй мөргөлдсөнийх нь төлөө Токио шийдвэртэй эсэргүүцэл илэрхийлж байгаагаа Пеньянд албан ёсоор мэдэгдсэн байна. “Энэ мэдэгдлээ бид Пеньянд дипломат шугамаар дамжуулсан” гэж Японы Ерөнхий сайд Шинзо Абэ мягмар гарагт парламентад мэдээлжээ. “Умард Солонгосын хөлөг манай эдийн засгийн бүсэд хууль бусаар нэвтэрч улмаар Японы загасчдын аюулгүй байдалд аюул учруулсан нь ноцтой асуудал. Манай Засгийн газар ийм үйлдлийг таслан зогсоохын төлөө шийдвэртэй арга хэмжээ авах болно” гэж Ш.Абэ мэдэгдсэн байна. 

Аравдугаар сарын 7-ны өглөө Японы эрэг орчимд Ишикава аймгийн Ното арлаас 350 км-ийн зайд Умард Солонгосын загас агнуурын хөлөг Японы загасчдын хөлөгтэй мөргөлдсөн осол гарсан юм. Умард Солонгосын хөлөг ердөө 20 минутын дотор живж, Японы эргийн хамгаалалтынхан тэдний 60 хүнийг аварч тэнд байсан Умард Солонгосын өөр нэг хөлөгт шилжүүлэн өгчээ.

БНАСАУ-ын хөлгүүд сүүлийн үед энэ бүсэд нэвтрэн загас барих болоод байгаа юм. Японы загас агнуурын байгууллагын мэдээлснээр бол өнгөрөгч 2018 онд ийм зөрчил таван мянга гаруй бүртгэгджээ.