Хятад улс өөрийн нутаг дахь Шинжаан Уйгурын лалын цөөнхийн төлөөлөл болон уйгаруудыг олноор нь мөрдөн мөшгөж, бөөнөөр нь саатуулан хүний эрхийг зөрчиж байна хэмээн БНХАУ-ын хэд хэдэн байгууллагын эсрэг АНУ хориг тавьсан байна. АНУ-ын Худалдааны яамны хоригийн энэ жагсаалтад 28 байгууллага, аж ахуйн нэгж орсныг Америкийн Холбооны бүртгэлийн сайтад нийтэлжээ.

Эдгээр байгууллагууд Вашингтоны гадаад улс төрийн бодлогын эсрэг үйл ажиллагаа явуулж байна гэж АНУ-ын Засгийн газар үзсэн байна. “Энэ байгууллагууд хүний эрхийг зөрчин, Шинжаан Уйгарын автономит мужид амьдардаг уйгар, казах болон лалын бусад цөөнхийн эсрэг ажиллагаа явуулан тэднийг мөрдөн мөшгөж, бөөнөөр нь саатуулан баривчилж байна” гэж баримт бичигт дурдсан байна. Хоригоор тэдгээр байгууллагын экспорт болон дамжуулан экспортлохыг хориглохоос гадна лиценз зөвшөөрөл олгохыг хориглож байна.

АНУ-ын Ерөнхийлөгч Дональд Трампын засаг захиргаа Хятадад лалын цөөнхийн эрхийг зөрчиж байгаагийнх нь төлөө хориг тавьж магадгүй байна хэмээн The New York Times хэвлэл бүр өнгөрөгч онд бичиж байсан юм. Энд уйгаруудыг тандан ажиглахад ашигладаг Америкийн ажиглалтын камерийн технологийг Хятадад худал­да­хыг хориглохоор төлөвлөж байжээ.

НҮБ-ын хүний эрхийн дээд комиссарын газрын мэдээгээр Хятадын шоронд нэг сая хүртэл уйгар хүнийг хорьж байгаа гэнэ. Уйгарууд бол БНХАУ-ын Шинжаан Уйгарын автономит мужид амьдардаг үндсэндээ лалын шашинт турк гаралтай хүмүүс юм. Хамгийн сүүлд 2008, 2009 онуудад уйгарууд бослого гаргасныг Хятадын Засгийн газар хүчээр дарсан юм.