Оростой агаарын шууд харилцаагаа зогсоосноор орос жуулчид ирэхээ байсан нь хэдий хэмжээний алдагдалд хүргэснийг Гүрж тооцож гаргалаа гэж тус улсын Үндэсний аялал жуулчлалын газрын тэргүүн Мариам Квривишвили “Имеди” телевизэд ярьсан байна. Түүнийхээр бол долдугаар сард 57, наймдугаар сард 56 сая ам.долларын алдагдал хүлээсэн гэнэ. Есдүгээр сард Оросоос ирэх жуулчны урсгал 20 хувь буурсан нь хувийн хэвшлийн салбарт ихээхэн нөлөөлж байна гэснийг РИА Новости агентлаг дамжуулсан байна. 

Үнэн алдартны парламент хоорондын Ерөнхий Ассамбейн чуулганы үеэр Оросын депутат Сергей Гаврилов Гүржийн парламентын даргын судалд хэнэггүй сууснаас үүдээд сөрөг хүчнийхэн үүнийг эсэргүүцэн энэ оны зургадугаар сарын сүүлчээс жагсаал цуглаан зохион байгуулж эхэлсэн юм. Жагсагчид Оросын эсрэг уриа лоозон барьж Оросын жуулчид, сэтгүүлчдэд халдаж эхэлсэн. Иргэдийнхээ аюулгүй байдлыг хамгаалах үүднээс Оросын эрх баригчид Гүрж рүү хийдэг байсан шууд нислэгээ долдугаар сарын 8-наас тодорхойгүй хугацаагаар зогсоосон нь байгалийн сайхан Гүрж рүү явж амардаг жуулчдын тоо буурахад нөлөөлсөн юм. Гүржийн Ерөнхий сайд Георгий Гахария есдүгээр сард Гүрж улс Оростой харилцаагаа хэвийн болгохын төлөө байна, энэ чиглэлээр эхний алхмаа хийнэ гэж мэдэгдэж байсан.