АНУ сүүлийн 25 жилд байгаагүй их хэмжээний цэргээ 2020 он гэхэд Европын улс орнуудад байрлуулахаар төлөвлөж байна гэж Европ дахь АНУ-ын армийн эх сурвалжаас авснаа Оросын ТАСС агентлаг энэ аравдугаар сарын 7-ны өдөр мэдээлсэн байна. 2020 онд болох “Defender 2020” томоохон хээрийн сургуулийн үеэр америк 20 мянган цэргээ Балти орчмын улсууд болон Польшид байршуулах юм байна. НАТО-гийн байлдааны чадавхыг өсгөх, эсрэг талын цохилтыг сөрөх чадваржуулах энэ том хээрийн сургууль 2020 оны дөрөв, тавдугаар сард болж 19 орны 37 мянган цэрэг дайчид оролцох юм. Хээрийн сургуулийн зохицуулах төв нь Германд байрлах аж.

Латвид болсон НАТО-гийн 12 орны цэрэг оролцсон олон улсын “Мөнгөн сум 2019” хээрийн сургууль аравдугаар сарын 6-нд өндөрлөсөн. Энэ хээрийн сургуульд Беларусын Зэвсэгт хүчний төлөөлөгчид бас ажиглагчаар оролцсон байна. Энэ аравдугаар сард Орос, Хятад, Энэтхэгийн хамтарсан терроризмын эсрэг хээрийн сургууль Энэтхэгийн далайд болсон юм. Харин есдүгээр сард ОХУ-ын Батлан хамгаалах яамнаас Хятад, Киргиз, Казахстан, Тажикстан зэрэг долоон орны дайчид оролцуулсан команд штабын стратегийн “Төв-2019” сургуулилт хийсэн юм.