АНУ, Хятадын гол хэлэлцээрч нарын орлогчдын түвшинд болж байгаа уулзалт худалдааны хэлэлцээрийн гол асуудлаар тодорхой дэвшилд хүрч чадсангүй гэж эх сурвалжаас авснаа South China Morning Post сонин пүрэв гарагт мэдээлсэн байна. Хэвлэлд бичсэнээр бол уулзалт хоёр хоног үргэлжилнэ гэж төлөвлөж байсан ч БНХАУ-ын Ерөнхий сайдын орлогч Лю Хэ тэргүүтэй Хятадын төлөөлөгчид хэлэлцээрийн эхний өдөр пүрэв гарагт Вашингтоноос мордсон гэнэ. 

Төлөвлөсөн энэ хоёр хоногт хэлэлцээрт бэлтгэх явцдаа Хятадын тал АНУ-ын Ерөнхийлөгч Дональд Трампын Хятадын компаниудад шударга бус байдлаар хандах гэсэн технологи албадан дамжуулах, төрөөс татаас өгөх зэрэг асуудлыг хэлэлцэхээс татгалзсан юм байна. Хэдийгээр эдгээр асуудал нь АНУ-ын хувьд нэг их сонирхол татсан асуудал биш ч гэлээ хэлэлцээрт оролцогсод ихэнх хугацаандаа оюуны өмчийг хамгаалах, хөдөө аж ахуйн бүтээгдэхүүн нийлүүлэх асуудлыг ярилцсан байна.

Тэгээд ч Бээжингийн хамгийн их сонирхож байгаа татвар нэмэгдүүлснээ эргэж харах боломжийг АНУ-ын төлөөлөгчид амлана гэдэгт Хятадын тал нэг итгэхгүй байна. АНУ, БНХАУ-ын худалдааны хэлэлцээрийн 13 дахь үе шат аравдугаар сарын 10-нд Вашингтонд эхэлнэ. Цагаан ордны мэдэгдсэнээр бол энэ үеэр талууд “Технологи албадан шилжүүлэх, оюуны өмчийн эрх, үйлчилгээ, тарифын бус хязгаарлалт, хөдөө аж ахуй бүтээгдэхүүний талаар ярилцах” юм байна. Хэдэн сарын турш үргэлжилж, хурцадсаар байгаа АНУ, Хятадын худалдааны сөргөлдөөнийг эцэс болгох зорилготой хэлэлцээрийн 12 дахь шат Шанхайд долдугаар сарын 30-31-нд болсон юм.