Украин улс 2020 оны эцэс гэхэд ч НАТО-гийн тавьж байгаа стандартад бүрэн нийцэж чадахгүй гэж НАТО-гийн парламентын ассамблейн намрын чуулганы хэлэлцүүлэг дээр Канадын сенатч Жейн Корди мэдэгджээ. Түүнийхээр бол 2019, 2020 он бол Украин аюулгүй байдал, батлан хамгаалах салбарт шинэчлэл хийх шийдвэрлэх онууд байх болно гэнэ. 2014 оноос хойш энэ улсад харьцангуй дэвшил гарсан хэдий ч 2016 онд тавьсан зорилтдоо Киев хүрч чадаагүй гэснийг РИА Новости агентлаг дамжуулжээ. Үүнээс гадна баримт бичигт Украин НАТО болон Европын холбооны гишүүн болох шалгуурыг хангахад хол байгаа гээд бүхий л шалгуур болзлыг биелүүлсний дараа л эдгээр нийгэмлэгийн гишүүн болно гэж тэмдэглэсэн байна.

Европын холбоо болон НАТО-д элсэхийн тулд шаардлагатай шалгуурыг ойрын таван жилд хангана хэмээн Украин засгийн газрын мөрийн хөтөлбөрийн төсөлдөө тусгалаа хэмээн өнгөрөгч есдүгээр сард мэдээлж байсан. Украины ерөнхийлөгчийн “Ард түмний зарц” нам үүний өмнө Европын холбоо нь Украинд, Брюссельд Киевийн оролцооноос илүү хэрэгтэй гэж тэмдэглэж байсан юм. Украин улс Европын холбооны эрчим хүчний зах зээлд 2025 он гэхэд нэгдэхээр найдаж байгаа юм. Харин Европын холбоо болохоор тус нийгэмлэг түүхийнхээ туршид хамгийн их тусламж дэмжлэгийг сүүлийн таван жилд Киевт үзүүлсэн гэжээ. Украины хувьд өнөөдөртөө НАТО-д элсэхэд бэлэн биш байна гэж Ерөнхийлөгч Владимир Зеленский НАТО-гийн ерөнхий нарийн бичгийн дарга Йенс Столтенбергтэй өнгөрөгч есдүгээр сарын 27-нд уулзахдаа ярилцсан байна.