Америк, Хятадын худалдааны хэлэлцээрт тодорхой ахиц гарлаа хэмээн АНУ-ын Ерөнхийлөгч Дональд Трамп мэдэгдсэнийг Reuters агентлаг дамжуулжээ. АНУ-ын Сангийн сайд Стивен Мнучин энэ талаар сэтгүүлчдэд мэдээлэхдээ ирэх долоо хоногоос хэрэгжүүлнэ гэж байсан “татварыг 15 хувь нэмэгдүүлэхээ” үнэхээр больсон гэсэн байна. Хятадын Ерөнхий сайдын орлогч Лю Хэтэй хэлэлцээр хийснийхээ дараа АНУ-ын Ерөнхийлөгч Дональд Трамп хэлэлцээр дуусахад дор хаяж таван долоо хоног шаардлагатай гэж сэтгүүлчдэд мэдээлжээ. Хэлэлцээрт Чилид гарын үсэг зурна гэснийг тэр үгүйсгээгүй байна. “Хэлэлцээрт гарын үзэг зурахад энэ бүтэн жил хангалттай байлаа гэдэгт бид санал нийлсэн. Магадгүй одоо гурав, дөрөв бүр таван долоо хоног болж мэднэ. Та бүхний мэдэж байгаачлан бид Чилид дээд хэмжээний уулзалтад бүгд цуглана. Энэ үйл явдал тэнд болж мэднэ” гэж Д.Трамп сэтгүүлчдэд мэдэгдсэнийг РИА Новости агентлаг эш татжээ. Хэлэлцээрээр хөдөө аж ахуйн 40-50 тэрбум ам.долларын бараа худалдах, санхүүгийн үйлчилгээ, оюуны өмчтэй холбоотой асуудлаар тохиролцоонд хүрсэн гэж Ерөнхийлөгч тэмдэглэсэн байна. 

Хамгийн сүүлд есдүгээр сард АНУ хятадын 300 тэрбум долларын бараа бүтээгдэхүүний татварыг 15 хувь өсгөсөн. 250 тэрбум ам.долларын өөр бусад бараа бүтээгдэхүүнд аравдугаар сарын 1-нээс 30 хувийн татвар ногдуулаад байгаа юм. Хятад үүний хариуд Америкийн 75 тэрбум ам.долларын үнэ бүхий бараанд 10 хувийн татвар ногдуулснаа, хоёр дахь шатанд нь арванхоёрдугаар сарын 15-наас дахиад нэмэлт таван хувийн татвар ногдуулна гээд байгаа юм.