Сирийн хойд нутагт байлдааны ажиллагаа эхлүүлсэн Туркийн цэргийнх­ний галд Сирийн Кобани хотод байрлаж байсан АНУ-ын тусгай албаны дайчид өртлөө гэж АНУ-ын Батлан хамгаалах яам дахь эх сурвалж Newsweek хэвлэлд ярьсан байна. Эх сурвалжийн хэлснээр бол Америкийн дайчид өөрсдийгөө хамгаалахын тулд хариу гал нээхээр завдаж байсан боловч Туркийн цэргийн гал удалгүй зогссон болохоор ийм үйлдэлд хүрээгүй гэнэ.

Эх сурвалж бас Америкийн цэргийнхний байрлаж байгаа байрлалыг Туркийн цэргийн командлал мэдэж байсан гэж нэмж хэлжээ. Туркийн цэргийнхний галд өртсөн америк цэргүүдийн тоог эх сурвалж хэлээгүй байна. Туркийн цэргийн командлал үүний хариуд Америкийн цэргийнхний байрлалын дэргэдэх курдуудийн байрлалыг буудахад АНУ-ын зэвсэгт хүчний бааз өртөхгүй байх бүхий л арга хэмжээг авсан гэж мэдэгджээ.

Р.Эрдоган: Сири дэх ажиллагаагаа зогсоохгүй

АНУ-ын Батлан хамгаалахын сайд Марк Эспер Сирийн нутаг дахь америкийн цэргүүдэд аюул учруулж, “Лалын улс” зэвсэгт бүлэглэлтэй тэмцэхэд нь саад болж мэдэх учраас Сирийн нутагт явуулж байгаа цэргийн ажиллагаагаа зогсоохыг Туркийн армид санал болгосон байна. Харин Туркийн Ерөнхийлөгч Режеп Тайип Эрдоган хариуд нь Анкара Сири дэх байлдааны ажиллагаагаа үргэлжлүүлнэ гэж мэдэгджээ. Туркийн Ерөнхийлөгч бас курдуудэд дэмжлэг үзүүлэхээ зогсоохыг уриалахад Вашингтон татгалзсан гэдгийг бас тэмдэглэсэн байна. “Биднийг энэ ажиллагаагаа зогсоо гэж заналхийлж байна. Би АНУ-ын Ерөнхийлөгч Д.Трамп, бусад орнуудад курдуудийг дэмжихээ зогсоо гэж хэлсэн ч та нар үүнийг хийгээгүй. Харин одоо бид татгалзаж байна” гэж Эрдоган хэлжээ.