Франц улс Сирийн умард нутагт Туркийн зэвсэгт хүчин байлдааны ажиллагаа явуулж эхэлсэнтэй холбогдуулан өөрийн цэргийнхэн болон энгийн иргэдийн аюулгүй байдлыг хангах арга хэмжээ авч эхэлсэн байна. Үүний зэрэгцээ Парис холбоотнуудын хамт курдуудийн байрлалд цохилт өгч байгаа туркийн дайралтыг зогсоох талаар дипломат алхмууд хийх болно гэж Францын аюулгүй байдлын зөвлөлийн хуралдаанаас шийдвэрлэснээ мэдэгджээ. “Туркийн эхлүүлсэн давшилтын ажиллагааг нэн даруй зогсоохын тулд Франц улс өөрийн түнш орнууд болон Европын холбооны терроризмын эсрэг олон улсын эвсэл, НАТО, НҮБ-ын Аюулгүйн зөвлөлтэй нягт хамтран ажиллаж дипломат хүчин чармайлт гаргана” гэж тус улсын тараасан баримт бичгээс Reuters агентлаг эш татжээ.

Олон улсын терроризмын эсрэг ажиллагаанд оролцож байгаа өөрийн цэргийнхэн болон энгийн иргэд, хүмүүнлэгийн ажилтнуудын аюулгүй байдлыг хангах арга хэмжээг ойрын үед авч хэрэгжүүлнэ гэж энэ мэдээлэлд дурдсан байна. Хоёр улсын хөлбөмбөгийн багуудын сөргөлдөөнөөс болоод турк-францын харилцаа сүүлийн өдрүүдэд хурцдаад байгаа юм. Франц Туркийн багууд аравдугаар сарын 14-нд Парист “Стад де Франс” цэнгэлдэх хүрээлэнд тоглоно.Туркийн дасгалжуулагч Шенол Гюнешийн хэлснээр бол өөрийнх нь баг Сирид явуулж байгаа байлдааны ажиллагаанд оролцож байгаа цэргийнхнээ дэмжиж байгаа юм. Гэхдээ тэр бас хувьдаа “Ямар ч төрлийн хүчирхийллийн эсрэг байгаа” гэдгээ хэлжээ. Харин францын Дидье Дешам хөлбөмбөг бол улс төрөөс ангид зүйл гэсэн байна.

Хоёр баг тус бүр 18 оноотой байгаа ч Туркийн баг нутгийн оноогоороо тэргүүлж байгаа юм. Туркийн хэвлэлүүдэд бичиж байгаагаар бол Парис дахь тэмцээнд тус улсын 30 мянган хөгжөөн дэмжигч очих юм байна. Европын хөлбөмбөгийн холбооны төлөөлөгч тэмцээнд оролцогчид улс төрийн болон шашны ямар нэг үзэл бодол илэрхийлэх ёсгүй гэдгийг сануулж байна. “Туркийн хүчирхийллийг” зогсоохоор Сирийн Засгийн газрын цэрэг умард нутаг руугаа хэдийнээ хөдөлжээ.