Эквадорын уугуул үндэстний төлөөлөгчид Засгийн газраас түлш шатахуунд олгодог татаасаа зогсоосныг эсэргүүцсэн хөдөлгөөнөө зогсоохоо эрх баригчдтай тохиролцлоо гэж тус улсад суугаа НҮБ-ын төлөөлөгчөөс авсан мэдээллээ AFP хэвлэл дамжуулсан байна. Засгийн газар түлш шатахуунд олгодог байсан татаасаа зогсоох шийдвэр гаргаснаар тус улсад үнэ 120 хувь нэмэгдсэнээс үүдээд нутгийн уугуул иргэд эсэргүүцлээ илэрхийлэн аравдугаар сарын эхнээс гудамжинд гарсан юм. Эсэргүүцлийн хөдөлгөөн нь улмаар эмх замбарагүй байдал болон хувирч хууль сахиулагчидтай мөргөлдсөнөөс долоон хүний амь үрэгдэж 1300 орчим хүн бэртэж гэмтсэн юм. Үүнээс үүдэн Засгийн газраа нийслэл Китогоос өөр хотод шилжүүлээд байгаа Ерөнхийлөгч Ленин Морено эсэргүүцлийн хөдөлгөөний удирдагчид, уугуул иргэдийн төлөөлөгчдөд хэлэлцээр хийе хэмээн уриалсан юм.