Оросын цэргийнхэн энэ оны тавдугаар сард Сирийн баруун хойд нутагт байдаг дөрвөн ч эмнэлгийг агаараас дайрсан гэж “The New York Times” хэвлэл оросын цэргийн нисэгчдийн ажиглагчидтайгаа ярьсан ярианы бичлэг, нүдээр үзсэн хүмүүсийн яриаг үндэслэн гаргалгаа хийжээ. Хэвлэлд бичсэнээр бол эмнэлгүүд рүү тавдугаар сарын 5, 6-ны өдрүүдэд 12 цагийн турш дайрсан гэнэ. Агаарын дайралтад Сирийн Ерөнхийлөгчийн эсрэг талынхны хяналтад байдаг эмнэлгүүд өртжээ. Ийм болохоор Оросын цэргийнхэн сөрөг хүчнийхний хянаж байгаа газар нутгийг хяналтдаа авах гэсэн Башар Асадын дэглэмд туслах гэж дайрахдаа эмнэлгүүдэд цохилт өгсөн байна гэж NYT баталж байна. 

Сонин бас наймдугаар сард болсон дайралтын талаар НҮБ мөрдөн шалгах ажиллагаа эхлүүлсэн гэсэн байна. НҮБ-ын Ерөнхий нарийн бичгийн даргын албан ёсны төлөөлөгч Стефан Дюжаррик мөрдөн шалгах дотоод комисс энэ халдлагын талаар тусгай илтгэл гаргах юм уу, хууль зүйн хариуцлага хүлээлгэхгүй гэж мэдэгджээ. Эмнэлгүүдийг агаараас дайрсан эсэх талаараа Оросын Засгийн газар шууд харилцаагүй гэдгийг хэвлэл онцолсон байна. NYT хэвлэлийн баталж байгаагаар бол ОХУ-ын Гадаад хэргийн яамны төлөөлөгч Оросын цэргийн нисэх хүчин зөвхөн “маш сайн судалгаан дээр үндэслэн тодорхой цэгт” цохилт өгч байгаа гэж мэдэгджээ. Хүний эрхийг хамгаалах “Хүний эрхийн төлөөх эмч нар” байгууллага үүнтэй холбогдуулан 2011 оноос хойш Сирийн эмнэлгүүд рүү 583 удаа халдан дайрч, эмнэлгийн 916 ажилтны аминд хүрсэн гэжээ. Эдгээр дайралтын бараг тал хувь болох 266-г нь Сирид Оросын цэргийн ажиллагаа эхэлсэн 2015 оны есдүгээр сараас хойш үйлдсэн гэж мэдээлж байна.