Сүүлийн 60 жил болж байгаагүй хүчтэй “Хагибис” хар салхины улмаас Японд хамгийн багаар бодоход 47 хүн амь үрэгдэж, 19 хүн сураггүй алга болсонд тооцогдож, 200 орчим хүн хүнд хэлбэрээр бэртэж гэмтээд байна гэж мэдээллийн “Киодо” агентлаг мэдээлсэн байна. Бямба гарагт усархаг бороо орж эхэлснээр Хонсю арал дээрх олон гол эргээсээ хальсан нь ийм гамшиг дагуулж байгаа юм.

Нийслэл Токиогийн хоёр нисэх буудал үйл ажиллагаагаа зогсоож, орон нутгийн олон нислэг тасалджээ. Төмөр замд ч нэлээд саатал гарсан ч сэргээхээр ажиллаж байна. Баруун нутагт усны түвшин таван метр хүрч үерлэж байгаагаас аврах ажиллагааныхан нутгийн 360 орчим хүнд тусламж үзүүлжээ. Нагано хотод гудамж талбай, байшингууд усанд автсанаас гадна зорчигч тээврийн хурдан 10 галт тэрэг усанд автан зогсчээ.

Аврах ажиллагаанд цэргийн болон орон нутгийн өөрийгөө хамгаалах хүчний 27 мянган албан хаагч оролцож нисдэг тэрэг, завь ашиглан усанд автсан барилга байгууламжуудаас хүмүүсийг гаргаж байна. “Усны түвшин шалнаас дээш гарсан” гэж 72 настай эрэгтэй яриад өөрөө ширээн дээр зогсч байсан гэжээ. Фукушима аймгийн 77 настай эмэгтэй аврах ажиллагааны үеэр 40 метрийн өндөрт хөөрсөн нисдэг тэрэгнээс унасныг эмнэлэгт хүргэсэн ч амь алдсан байжээ.

Аравдугаар сарын 13-ны өдрөөс Японы бүхий л нутагт аюулын түвшин зарласан юм. “Хигибис” хар салхийг тус улсад сүүлийн 60 жилд болж байгаагүй хамгийн хүчтэй салхи гэж байна.