Аравдугаар сарын 15-17-ны өдөр хүртэл үргэлжлэх цэргийн хээрийн сургуулийн үеэр Орос далавчит болон баллистик пуужин 16-г харвана гэж мэдэгджээ. ОХУ-ын Батлан хамгаалах яамны эх сурвалжаас авч “Интерфакс” агентлагийн мэдээлснээс үзвэл эдгээр пуужинг Баруун, Өмнөд, Төвийн цэргийн тойрог болон Умард флотын нисэхийн буудлагын талбайгаас хөөргөх юм байна. “Сургуулилтын үеэр далавчит болон баллистик пуужин 16-г хөөргөхөөр төлөвлөсөн. Нисэх хүчний ажиллагаанд зориулж манай нутаг дэвсгэр дэх бүх нисэх буудлыг ашиглана” гэж ОХУ-ын БХЯ-ны олон улсын цэргийн хамтын ажиллагааны ерөнхий газрын дарга Евгений Ильины хэлснийг агентлаг эш татжээ. 

Гадаад цэргийн атташе нарт зориулсан брифинг дээр Е.Ильин энэ сургуулилтын үеэр Орос тив хоорондын “Ярс” (SS-29) баллистик пуужин болон “Синева” (SS-N-23) баллистик пуужинг Кура дахь талбайгаас хөөргөнө гэж мэдэгдэв.