Ерөнхийлөгч Владимир Зеленскийд таатай ханддаг украинчуудын тоо өмнөх есдүгээр сард 73 хувь байсан бол аравдугаар сард 66 хувь болж буурлаа хэмээн Киевийн нийгэм судлалын олон улсын хүрээлэн албан сайтдаа мэдээлсэн байна. Ерөнхий сайд Алексей Гончарук, парламент Дээд Радагийн спикер Дмитрий Разумковт хандах таатай хандлага мөн л долоо, зургаан хувиар унасан байна. “Санал асуулгад оролцогчдын 64 хувь нь Ерөнхийлөгчийн үйл ажиллагаа, мэдэгдэлд ес, аравдугаар сард нааштай хандаж байсан бол 22 хувь нь итгэлгүй хандаж байлаа. Хүмүүсийн 51 хувь нь Засгийн газрын үйл ажиллагааг дэмжиж байхад 27 хувь нь дэмжихгүй байна. Ард иргэдийн 53 хувь нь Дээд Радагийн үйл ажиллагаанд ес, аравдугаар сард итгэл үзүүлж, 30 хувь нь итгэхгүй байна” гэж санал асуулгын дүнгийн тухай мэдээлэлд дурджээ.

Арван украин хүний нэг нь Донбасс дахь сөргөлдөөнийг эцэс болгох тухай ноён В.Зеленскийн төлөвлөгөөний эсрэг эсэргүүцлийн хөдөлгөөн өрнөсөн тухай дуулаагүй байхад, 22 хувь нь эсэргүүцэгчдийн шаардлагыг мэдэхгүй, 26 хувь нь ямар нэг хэмжээгээр дэмжиж, 41 хувь нь дэмжээгүй байна. “Штайнмайерын формул” нэрийн дор зөвшилцөх гэсний төлөө аравдугаар сарын эхээр Украинд жагсаал цуглаан болж эхэлсэн юм. Энэ “Формул” нь чөлөөт сонгууль явуулж Донбасст онцгой статус олгох тухай болохоор эсэргүүцлийн жагсаалд оролцогчид үүнийг “Орост бууж өгсөн хэрэг” гэж эсэргүүцэж байгаа юм.