Сирид байлдааны ажиллагаа хийж эхэлснийх нь төлөө АНУ-ын Ерөнхийлөгч Дональд Трамп Туркийн эсрэг хориг тавих зарлигт гарын үсэг зурлаа хэмээн АНУ-ын Төрийн нарийн бичгийн дарга Майк Помпеогийн эх сурвалжаас аван РИА Новости агентлаг мэдээлсэн байна. Энэ хориг нь Сирийн Арабын Бүгд найрамдах улсад явуулж байгаа үйл ажиллагааг зогсоох, тус улсад дарамт үзүүлэхэд чиглэгдсэн гэж эх сурвалж хэлжээ.

Одоо АНУ-ын Сангийн яам болон Төрийн департамент Туркийн Засгийн газартай холбоотой, хэд хэдэн байгууллага “дэлхий дахины цаашдын хувь заяа, Сирийн зүүн хойд нутгийн тогтвортой байдал, аюулгүй байдалд аюул учруулах” хувь хүнд энэ хориг чиглэж байгаа юм байна. “Туркийн өндөр албаны гурван хүн, Эрчим хүчний болон Батлан хамгаалах яам бас энэ хоригт орж байгаа” гэж мэдэгдэлд дурджээ.
Үүний өмнө Пентагоны тэргүүн Марк Эспер Туркийн Ерөнхийлөгч Режеп Тайип Эрдоганыг Сирид хүмүүнлэгийн хямрал үүсгэж цэргийн гэмт хэрэг үйлдэж байна хэмээн буруутгаж байсан юм. Турк улс энэ сарын 9-ний өдрөөс Сирийн умард нутагт “Энхтайвны эх булаг” цэргийн ажиллагаагаа эхлүүлсэн юм. Энэ ажиллагаагаа Туркийн Засгийн газар Сирийн дүрвэгсдийг эх нутагт нь буцаах, бүс нутагт энхтайван тогтоох зорилготой гэж нэрлээд байгаа юм.

Сири дэх цэргийн ажиллагаагаа зогсоохыг Европын холбооны 28 улс орны Гадаад хэргийн яам уриалаад байна. Харин АНУ-ын Төлөөлөгчдийн танхимын спикер, ардчилагч Нэнси Пелоси Туркийн эсрэг АНУ-ын Ерөнхийлөгч Дональд Трампын тавьж байгаа хориг нь Сирийн умард нутгийн нөхцөл байдлыг тогтворжуулахад хангалтгүй гэжээ. Хатагтай Н.Пелоси “Энэ хязгаарлалтын арга хэмжээ нь тэнд болж байгаа хүмүүнлэгийн сүйрлийг зохицуулахад хангалтгүй” гэж мэдэгдсэн байна.

Сири дэх ажиллагаагаа өргөтгөхөд Оростой харилцах талаар Р.Эрдоган ярьжээ

Сирийн Кобани хот руу хийх “Энхтайвны эх булаг” ажиллагааг өргөжүүлэхэд Оросын тал нааштай хандаж байгаа гэж Туркийн Ерөнхийлөгч Режеп Тайип Эрдоган сэтгүүлчдэд мэдэгдсэн байна. “Өнөөдөр маш их цуурхал явж байна, гэсэн ч бид Элчин сайдын яамаараа дамжуулан Кобанийн асуудлаар Орос нааштай хандаж байгааг мэдэж байна. Үүнд нэг их асуудал байхгүй” гэж Р.Эрдоганы хэлснийг NTV хэвлэл эш татжээ. Түүнийхээр бол Турк улс Оростой цэргийн болон дипломатын түвшинд хэлэлцээр хийж байгаа юм байна.

Р.Эрдоган бас Туркийн арми Сирийн Манбижид орохгүй гэнэ. Тийшээ “Арабын жинхэнэ эзэд нь орно. Туркийн гол зорилго бол тэдний аюулгүй байдлыг хангах явдал” гэж Р.Эрдоган хэлжээ. Үүний өмнө Режеп Тайип Эрдоган Сирийн асуудлаар Анкара нь Москватай ямар ч асуудал байхгүй гэж мэдэгдэж байсан юм. Үүнтэй зэрэгцээд Сирийн Засгийн газрын цэрэг өмнө нь Курдийн автономит захиргааныхны хянаж байсан умард нутгийнхаа Манбиж хотод орлоо гэж Сирийн төрийн Ikhbariya телевиз мэдээлснийг РИА Новости агентлаг дамжуулжээ.