Сирийн умард нутагт явуулж байгаа байлдааны ажиллагааных нь төлөө Канад улс Туркт зэвсэг нийлүүлэхээ түр хугацаагаар зогсоолоо хэмээн Globe and Mail сонин, France24 телевиз мэдээлсэн байна. Турк улс Сирид цэргийн хүчээр довтолсныг Канад шийдвэртэй хэлэлцэж байна гэж Канадын Гадаад хэргийн яам мэдэгдсэнийг телевиз эш татав. Туркийн энэ ажиллагаа “тун эмзэг” бүс нутгийн тогтвортой байдлыг алдагдуулж алан хядагч “Лалын улс” зэвсэгт бүлэглэлийн эсрэг явуулж байгаа олон улсын эвслийн хүчин чармайлтыг бусниулж мэдэх юм гэж Гадаад хэргийн яам мэдэгдээд энгийн иргэдийн сууринг хамгаалах, тэдэнд хүмүүнлэгийн тусламж хүргэхийг уриалсан байна. 

Турк улс Сирид байлдааны ажиллагаа эхлүүлсэнтэй холбогдуулаад Франц, Герман улсууд Анкарад зэвсэг нийлүүлэхээ зогсоож байгаагаа мэдэгдсэн. Анкарагийн энэ үйлдлийг АНУ бас буруушааж Ерөнхийлөгч Дональд Трамп тус улсын эсрэг хатуу хориг тавихаар Конгресстой ажиллаж байна гэжээ. Турк улс энэ аравдугаар сарын 9-нөөс Сирийн умард нутагт байрлаж байгаа курдийн Ардын өөрийгөө хамгаалах отрядын эсрэг “Энхтайвны эх булаг” байлдааны ажиллагаа эхлүүлсэн юм. Энэ байгууллагыг Анкара террорист байгууллага гэж үздэг юм.