Улс орнуудын хооронд цөмийн дайн эхлэх эрсдэл өссөөр байна гэж НҮБ-ын Ерөнхий нарийн бичгийн даргын орлогч, зэвсэглэлийн асуудлаарх дээд төлөөлөгч Изуми Накамицу “Коммерсант” хэвлэлд өгсөн ярилцлагадаа дурдсан байна. Түүнийхээр бол дэлхий дахинд, ялангуяа цөмийн зэвсэгтэй орнуудад итгэлцэл хомсодсоноос сөргөлдөөн болж магадгүй гэнэ. НҮБ-ын Ерөнхий нарийн бичгийн даргын орлогч бас өнөөдөр дэлхий дахин эмх замбараагүй байдалд байна гэжээ. “Шүүх өдөр”-ийн алдарт цаг дахиад л шөнө дундуур хоёр минут эргэлээ. Нөхцөл байдал улам бүр аюултай болж байна гэж хатагтай И.Накамицу хэлсэн байна. Аюулын өөр нэг шалтгаан нь тэргүүлэх орнууд болон бусад улс орнуудын яриа хэлэлцээр дутагдалтай байгаа явдал, тэгээд ч улс орнууд яриа хэлэлцээр, дипломат аргаас илүү цэргийн боломжийг илүүд үзэж байна гэжээ. 

Зэвсэглэлд хяналт тавих явц суларч геополитикийн нөхцөл байдал улам төвөгтэй болж байгааг И.Накамицу тэмдэглээд “Зүгээр л нэг туйлт дэлхий гэж байхгүй болсон. Дэлхий олон туйлтай, улам төвөгтэй болж байна” гэсэн байна. Нөгөө нэг хүчин зүйл нь шинжлэх ухаан, шинэ технологийн урьд хожид байгаагүй хөгжил байж болно. Энэ нь дуунаас ч хэт хурдан зэвсэг, хиймэл оюун ухаан ашигласан зэвсэг, кибер орон зай дахь үйл ажиллагааны үр дагаврыг урьдчилан таамаглах аргагүй болж байна гэж тэр үзэж байна.