Германы арми НАТО-гийн хүчинтэй хамтраад цөмийн дайн эхэлсэн үед өөрийн үйл ажиллагааг хэрхэн ажиллах талаарх хээрийн сургууль хийж байна хэмээн мэдээллийн Xinhua агентлаг дамжууллаа. Сургуулилтын гол зорилго нь цэрэг дайчид сөнөөгч-бөмбөгдөгч онгоцонд цөмийн цэнэг суурилуулах хугацааг аль болох богиносгох явдал гэнэ. Ийм ч болохоор хээрийн сургуулийг Tornado онгоц буухад зориулсан Рейнланд-Пфальц холбооны тойргийн Бюхель дэх цэргийн нисэх буудалд хийж байгаа юм байна. Энд бас сум галт хэрэгсэл хадгалах газар доорх агуулахтай болохоор цэргүүд тэндээс цэнэг зөөн сургуулилж байна. 

Хэдийгээр Герман өөрийн гэсэн цөмийн зэвсэггүй ч харин зэвсэглэлд нь ийм зэвсэг тээвэрлэх техник байгаа юм хэмээн мэдээллийн агентлаг онцолжээ. Гэхдээ цөмийн судлаачдын хэлж байгаагаар бол Америкийн армиас ХБНГУ-д байрлуулсан цөмийн цэнэг Бюхелийн баазад хадгалагдаж байгаа гэдэг ч Берлин энэ мэдээлийг няцаадаг юм.