Сирийн умард нутагт байлдааны ажиллагаа явуулж эхэлсэн Туркийн эсрэг хориг тавих нь зүйтэй гэж Францын парламентын улс төрийн намаас бүрдсэн 60 депутат мэдэгдсэн байна. Францын Үндэсний хурлын депутатууд “Барууны ардчиллыг зөрчиж байгаа Туркийн эсрэг Франц улс, Европын холбоо “шаардлагатай бүхий л арга хэмжээ” авах ёстой гээд энэ дотроо Анкара “нийтийн аюулгүй байдалд” заналхийлж байгаа учраас Туркийн НАТО-гийн гишүүнчлэлийг зогсоох арга хэмжээ эхлүүлэхийг ч санал болгож байгаагаа мэдэгдэлдээ дурджээ.

Туркийн эсрэг өмнө нь Оросын эсрэг тавьсан шиг эдийн засгийн хориг тавихыг ч бас уриалсныг ТАСС дамжуулсан байна. Үүний зэрэгцээ депутатууд туркт санхүүгийн дэмжлэг үзүүлэхгүй байж, тус улсыг Европын холбоонд элсүүлэх хэлэлцээрийг зогсоохыг уриалжээ. Депутатууд мэдэгдэлдээ “Барууны орнуудтай хамтдаа тулалдаж, өндөр үнээ төлсөн курдийн холбоотнуудаа хамгаалах” нь зайлшгүй чухал гэдгийг тэмдэглэжээ. Тэд бас “курдийн дайчдын өмнө” Европын холбоо сэтгэл санааны өртэй, Европыг хамгаалахын тулд тэднээс мянга мянган хүн амиа өгсөн гэжээ.