“БНАСАУ саяхан пуужин харваж туршсан нь “зарим хүнийг сандаргасан байх”, миний хувьд нэг их сандарч тэвдээгүй” гэж АНУ-ын Ерөнхийлөгч Дональд Трамп Twitter хуудсандаа бичжээ. “БНАСАУ-ын Төрийн зөвлөлийн дарга Ким надад өгсөн амлалтдаа хүрнэ гэдэгт би итгэлтэй байна” гэж АНУ-ын Ерөнхийлөгч бичсэн байна. Д.Трамп бас БНАСАУ-д Америкийн Дэд ерөнхийлөгч байсан Жо Байденыг “IQ муутай, түүнээс ч дор хүн” гэж нэрлэснийг сонсоод инээж “энэ бол надад өгч байгаа сануулга байх” гэжээ.

Умард Солонгосын мэдээллийн төв агентлаг тавдугаар сарын 22-нд Жо Байденыг “Хүний хамгийн энгийн чанараа гээсэн ухаан муутай хүн” гэж нэрлэсэн юм. Үүний өмнөхөн Жо Байден Филадельфид дэмжигчдийнхээ өмнө үг хэлэхдээ Умард Солонгосын удирдагч Ким Чен Уныг дарангуйлагч, тамлан зовоогч гэж нэрлэсэн юм. Түүний энэ үгийг Умардын мэдээллийн агентлаг “Улс төрийн сэдэлтэй ноцтой өдөөн хатгалга” гэжээ.

Тавдугаар сарын эхнээс БНАСАУ-ын эрх баригчид пуужингийн хэд хэдэн туршилт хийгээд байгаа юм. Эхнийхийг нь тавдугаар сарын 4-нд харвалаа гэж Өмнөд Солонгос мэдээлсэн бол дараа нь Умардын Хөдөлмөрийн намын төв хэвлэлд оператив тактикийн пуужин харваж байгаа гэрэл зураг нийтлэгдсэн юм. Хэдэн өдрийн дараа БНАСАУ бас дахиад Японы зүг пуужин харвалаа гэж Өмнөд Солонгосын цэргийнхэн мэдээлсэн юм.