“Оросын Балти орчим руу хийх түрэмгийллийн” явцад польшууд өөрсдийгөө золиослох ч америкчуудтай хамтраад Калининград мужийг эзэлнэ гэж Америкийн Жеймстауны сангийнхан төлөвлөгөө гаргажээ. Энэ мөргөлдөөний эцэст Польш оросын газар нутгаас авна гэж шинжээчид тооцоолсон байна. Жеймстауны сангийн “Балти орчмын улсуудыг хэрхэн хамгаалах вэ” гэсэн шинэ илтгэлд Москвад хуучин Зөвлөлт холбоот улсын харьяанд байсан, ялангуяа оросуудыг хамгаалах нэрээр оросууд цөөнх Латви, Эстони зэрэг улсуудыг булаан эзлэх хүчин чадал, санаархал бий гэжээ. АНУ-ын шинжээчид Оросын хамгийн түрүүнд довтлох Балти орчмын улсууд нь өөрийгөө хамгаалах чадваргүй гэсэн байна.

Оросын эсрэг босохын тулд Жеймстауны сан Польшид “Оросын Балти орчим” болох Калининград мужийг эзлэх нь зүйтэй гэсээн санал гаргаж байгаа нь энэ. “Энэ нь, өөрөөр хэлбэл эхний ээлжинд Калининградыг эзлэх нь энэ нутагт Оросын түрэмгийлэл, ялангуяа  “Искандер“ пуужин, “С-400” болон “Бастион” систем зэрэг цэргийн  үйл ажиллагааг тогтворжуулан тэнцвэржүүлэхэд чухал ач холбогдолтой болно. Нөгөө талаар ингэх нь Литва, Латви, Эстонийг хамгаалахын тулд энэ бүс нутагт НАТО-гийн агаарын болон тэнгисийн цэргийн хүчин идэвхтэй ажиллах боломж бүрдүүлнэ” гэж энэ илтгэлд дурдсаныг kresy.pl хэвлэл эш татсан байна. Илтгэлд Польшийн арми АНУ-ын цэрэгтэй хамтраад ийм даалгавар хэрэгжүүлэх гол хүчин гэдгийг тэмдэглээд “НАТО-гийн эсрэг хүчирхийлэл үйлдэхээр санаархах нь асар өндөр үнээр, өөрөөр хэлбэл Калининградаа алдахад хүрнэ гэдгийг санавал зохино” гэжээ. Хамгийн сонирхолтой нь, Калининград мужийн ирээдүй. Баримт бичигт дурдсанаар бол Калининградыг төвийг сахиулахын тулд Польш өөрийн цэргүүдийг золиосонд гаргасан болохоор дайны дараа түүнийг Польшийн мэдэлд өгөх нь зүйтэй. Калининград мужид довтолсон тохиолдолд  оросууд тактикийн цөмийн зэвсэг хэрэглэхээр заналхийлж мэдэх ч энэ нь магадлал багатай юм. АНУ-ын цэргийнхний үзэж байгаагаар бол үүнээс долоо хоногийн дараа гэхэд зүүн Европ хяналтад орж, сарын дараа гэхэд “оросууд Литва, Латви, Эстониос хөөгдөх болно” гэнэ. Жеймстауны сан гэдэг нь 1984 онд байгуулагдсан засгийн газрын бус судалгааны байгууллага гэдгийг EADaily тодотгосон байна. Энэ сан бүр байгуулагдахаасаа эхлээд л Зөвлөлт холбоот улс задарна гэдгийг бичиж байжээ.