Алан хядагч “Лалын улс” зэвсэгт бүлэглэлийн толгойлогч Абу Бакр аль-Багдадиг устгахад Орос, Сири, Турк, Ирак улсууд АНУ тусалсан гэв. Дональд Трампын хэлснээр бол АНУ-ын цэргийн ажиллагааны зорилгыг Москва мэдээгүй ч түүнтэй нягт холбоотой ажилласан гэнэ. Харин ОХУ-ын БХЯ болохоор үүнийг няцааж байгаа юм.
“Лалын улс” зэвсэгт бүлэглэлийн удирдагч Абу Бакр аль-Багдадиг устгасан АНУ-ын тусгай ажиллагааны үеэр Орос Америкийн нисдэг тэргүүдийг Сирийн нутагт нэвтрүүлсэн гэнэ. Энэ талаар Дональд Трамп ч илгээлтдээ  “нягт хамтран ажилласан” хэмээн дурдсан байдаг. Д.Трамп бас энэ ажиллагаанд Сирийн курдууд тусалсан гэдгийг тэмдэглэжээ. “Ирак бас үнэхээр сайн хамтран ажилласан” гэжээ.
Ийнхүү АНУ-ын Ерөнхийлөгч Дональд Трамп “Лалын улс”-ын удирдагч аль-Багдадиг тусгай ажиллагааны үеэр устгасан гэж баталж байгаа юм. Тэр бүр энэ ажиллагааг Цагаан ордонд сайд нарын танхим, цэргийн болон тагнуулын удирдлагуудтай хамт шууд бичлэгээр үзсэн гэжээ.

Түүнийхээр бол “Лалын улс” зэвсэгт бүлэглэлийн удирдагч амиа золиослогчийн тэсрэх бодис бүхий бүсээ дэлбэлэхэд түүнтэй хамт өөрийн нь гурван хүүхэд амь үрэгдсэн гэнэ. “Тэр яг нохой шиг үхсэн. Тэр яг хулчгар амьтан шиг үхсэн. Дэлхий дахин одоо харьцангуй тайван боллоо” гэж Д.Трампын хэлснийг USA Today эш татсан байна. Энэ ажиллагааны үеэр түүний хэд хэдэн хамтрагч дайчин амь үрэгдсэн гэж Д.Трамп онцолжээ.
Аль-Багдадиг устгасан гэж үүний өмнө хэвлэлүүд бас мэдээлж байсан юм. Newsweek хэвлэлд бичсэнээр бол зэвсэгт дайчдын удирдагчийг Сирийн Идлиб мужид нуугдаж байна гэсэн мэдээлэл авсны дараагаар тусгай ажиллагаа зохион байгуулсан юм байна. Энэ ажиллагаа аравдугаар сарын 26-нд болж дөрвөн цаг орчим үргэлжилжээ.