Улс орон даяар өрнөж байгаа эсэргүүцлийн хөдөлгөөний улмаас Засгийн газрын бүрэлдэхүүнийг солихоо Чилийн Ерөнхийлөгч Себастьян Пиньера мэдэгдсэн байна. “Би Засгийн газрыг огцорч шинэ засгийн газар бүрдүүлэхийг хүслээ” гэж тэр хэлжээ.
Энэ бол улс оронд шинэчлэл хийхийг шаардаж байгаа ард иргэдийн хүсэлтэд хариулахын тулд ингэх шаардлагатай байна гэж Пиньера хэлснийг Twitter хуудсаар шууд дамжуулсан байна. Аравдугаар сарын эхээр метрогоор зорчих үнийг нэмснээс болоод улс орон даяар эсэргүүцлийн хөдөлгөөн өрнөж жагсаал цуглаан болж эхэлсэн юм. Гэхдээ энэ нь нэг л шалтгаан нь. Ард иргэд эрүүл мэнд, боловсролын хангалттай сайн үйлчилгээ үнэгүй авч чадахгүй байгаа болон цалин хөлс өсөхгүй байхад, үнэ тариф өсч байгаад бухимдаж байна.
Тайван замаар болж байсан эсэргүүцлийн жагсаал цуглаан аравдугаар сарын 18-наас эхлэн эмх замбараагүй байдал болон хувирч жагсагчид хууль сахиулагчидтай мөргөлдөж эхэлснээр 19 хүн амь алдаад байна. Том хотуудад иргэд галдан шатааж, дэлгүүр байгууллагуудад халдаж эхэлснээр эрх баригчид хуягт машин, цэргийнхнийг оруулан, хөл хорио тогтоогоод байгаа юм.