Нутагт дэгдсэн ойн түймэр их хэмжээний газар авч байгаагаас Америкийн Калифорни мужийн бүхий л нутагт онц байдал тогтоолоо гэж тус мужийн амбан захирагч Гэвин Ньюсом албан сайтад мэдэгдсэн байна. “Мужийн хэмжээнд ойн түймэр дэгдэж, хүчтэй салхитай байгаагаас   амбан захирагч Гэвин Ньюсом мужийн бүхий л нутаг дэвсгэрт онц байдал зарлаж, хүмүүсийг нүүлгэн шилжүүлэх шийдвэр гаргалаа” гэж мэдэгдэлд дурджээ. “Энэ гамшигтай тэмцэхэд бид агентлаг, байгууллагуудын ажлыг уялдуулан бүхий л хүч бололцоогоо дайчлан ажиллах болно” гэж Ньюсом онцлоод ард иргэдийг нүүлгэн шилжихийг уриалжээ. Түймрийн аюулд ойрхон байгаа 200 орчим мянган хүнийг нүүлгэн шилжүүлэхээр төлөвлөөд байгаа юм байна. Амбан захирагчийн сайтад бичсэнээр бол түймрийн аюулд хэдэн зуун байшин барилга өртөж болзошгүй байна гэжээ.
Үүнээс гадна Америкийн эрчим хүчний “Pacific Gas and Electric” компани түймрийн улмаас  цахилгаан түгээхээ зогсоовол 940 мянган хэрэглэгч гэрэл цахилгаангүй болно гэж бямба гарагт мэдэгдээд байна. Энэ бол умард Калифорнийн хоёр сая орчим оршин суугчийн тухай яриа.