ОХУ-ын нийслэл Москва хотын Лефортовын районы шүүхээс Дагестаны засгийн газрын тэргүүн Абдусамад Гамидов болон түүний орлогч байсан Раюдин Юсуфов нарыг 40 гаруй сая рубль завшсаны нь төлөө ял оноон шийтгэжээ. Ерөнхий сайд асан Гамидовыг жирийн дэглэмтэй хорих ангид 6.5 жил хорих ялаар шийтгэсэн бол түүний орлогч байсан Юсуфовт 5.5 жилийн ял өгчээ.
Үүнээс гадна Гамидов, Юусуфов хоёр албан тушаал эрхэлж байхдаа улсад учруулсан хохиролд 41 сая рублийн нөхөн төлүүлэхээр шийвэрлэсэн байна. Шүүхийн тогтоолд зааснаар бол Гамидов, Юусуфов нар нь гэмт хэргийн бүлэглэлд нэгдэж төсвийн хөрөнгийг завшиж байсан ч толгойлогчид нь биш гэжээ. Шүүхийн үзсэнээр бол улсын хөрөнгийг завшдаг энэ бүлэглэлийг үүсгэн зохион байгуулагч нь өөр хүн гэнэ. Мөрдөн байцаалтын явцад Гамидов, Юусуфов нар Махачкалд гадаадын иргэн, харьяалалгүй хүнийг түр саатуулах байр барих нэрийн дор 41 сая рубль завшсан юм байна.