Османы эзэнт гүрэн нь армянчуудыг 1915 онд хоморголон хядсан талаар АНУ-ын Конгрессын Төлөөлөгчдийн танхим өнгөрөгч мягмар гарагт олонхын саналаар тогтоол баталсан байна. АНУ-ын конгресс ийм тогтоол гаргасанд Армяны Ерөнхий сайд никол Пашинян талархал илэрхийлээд “Энэ тогтоол бол түүхэн үнэнийг хүлээн зөвшөөрөх, шударга ёс тогтооход зоригтой алхам болж энэ аймшигт геноцидоос амьд үлдэж хоцорсон үр удамд нь тайвшрал авчрах болно” гэжээ.

Османы эзэнт гүрэн 1915-1923 оны хооронд армянчуудыг ялгаварлан гадуурхаж бөөнөөр нь хядсан талаар судлаачид янз бүрийн тоо хэлдэг. Туркийн өөрсдийн нь эх сурвалжаар болон судлаач Стенфорд Шоу “History of the Ottoman Empire and modern Turkey” номдоо хоёр сая орчим хүнийг хядсан гэсэн байдаг. Өөр бас Рональд Сюни амь үрэгдсэн армян хүний тоог хэдэн зуун мянгаас 1.5 сая гэжээ. “османы эзэнт гүрний нэвтэрхий толь” номд болохоор 500 мянга гэсэн бол армяны эрдэмтэд 1.5 сая гэдэг байна. Харин “Британника” нэвтэрхий толь бичигт 600 мянгаас 1.5 сая армяны хүнийг хядсан гэж бичсэн байдаг байна.
Османы эзэнт гүрэн армянчуудыг хоморголон хядсан талаар тогтоол гаргах талаар АНУ-ын конгресс олон жилийн турш ярьсаар байсан ч санал хурааж байгаагүй юм. Энэ тогтоолыг баталсан нь америк туркийн харилцаанд ноцтой үр дагавар авчирна гэж америкийн зарим шинжээч үзэж байна.