БНХАУ-д өнгөрөгч даваа гарагт эхэлсэн Хятадын Коммунист намын бүгд хурлаар хятадын эдийн засаг нийгмийг 2021-2025 онд хөгжүүлэх таван жилийн төлөвлөгөөг хэлэлцэж байна. Энэ хурлаар өмнө нь баталж байсан “Хятадад үйлдвэрлэв 2025” гэсэн стратегийг өөрчилж АНУ-ын Ерөнхийлөгч Дональд Трампын шүүмжлээд байгаачлан барууны компаниуд болон орон нутагтаа байгаа тэдний түншүүдийн шинэ дэвшилтэд технологийг нэвтрүүлэх практикт шилжиж мэдэхээр байна. Хятад энэ удаад зах зээлээ улам нээлттэй болгож эдийн засаг болон бусад салбаруудад хятадын компани гол байр суурь эзлэх ёстой гэдэг байр сууринаасаа татгалзах бололтой.

АНУ-тай хийсэн хятадын худалдааны дайн ямар ч ул мөргүй зүгээр өнгөрөөгүй. Энэ 2019 оны гуравдугаар улирлын дүнгээр хятадын Дотоодын нийт бүтээгдэхүүний өсөлт зургаан хувьтай гарсан нь 1990-ээд оны эхнээс хамгийн муу дүн. Эдийн засгаа дэмжихийн тулд хятадын эрх баригчид сүүлийн долоо хоногуудад гадаадын хөрөнгө оруулалтад онцгой анхаарч эхэлж байна. БНХАУ-ын Төрийн зөвлөлийн Ерөнхий сайд Ли Кэцян гэхэд л энэ сард BMW, Airbus зэрэг барууны том компаниудын менежерүүдтэй дугуй ширээнд уулзаж ярилцсан. Саявтар тэр бас орон нутагтаа байдаг Samsung-ийн хагас дамжуулагч үйлдвэрлэдэг заводод зочилж гадаадын компаниудад яг хятадын компанитай адил харьцана гэж мэдэгдсэн байна.