Украин оросын атомын цахилгаан станцуудад хүрэх чадалтай дунд тусгалын пуужин бүтээж, үүгээрээ цөмийн цохилт өгөх хэрэгтэй гэж украины улс төр, эдийн засгийн шинжээч Тарас Загородный “Главред” хэвлэлийн чатад бичсэн байна. “Бид оросоос, тэдний эрчим хүчний салбараас хараат байдлаа багасгахын тулд улс орондоо зэвсэг, ялангуяа пуужин үйлдвэрлэхээс айх хэрэггүй” гэж тэр бичжээ. Түүнийхээр бол Украин 2500 км хөөрөх чадалтай пуужин үйлдвэрлэх ёстой гэнэ.
“Ийм пуужинтай хоёр хороо, 200 пуужин бол Орост хохирол учруулах том хүч. Энэ бол бараг л цөмийн зэвсэг, нэг ийм пуужин оросын нутаг дахь атомын цахилгаан станцад хүрч чадна, тэгэхээр энэ бол цөмийн дэлбэрэлт гэсэн үг” гэж тэр баталж байна.

Хэдийгээр пуужин ердийн толгойтой байх ч Атомын цахилгаан станц дээр унаснаараа цөмийн дэлбэрэлт болно гэж шинжээч үзэж байна.
Энэ бол украины цэргийн болон улс төрийн шинжээчдийн хийж байгаа дайны тухай анхны мэдэгдэл биш. Үүний өмнө украины цэргийн шинжээч Валентин Бадрак бас украин улс Москва хүрэх чадалтай 1500 км-ийн тусгалтай пуужин бүтээх чадалтай гэж байсан юм. Цэрэг арми, зэвсэглэлийн судалгааны төвийн захирлын орлогч Михаил Самусь ч бас Азов-Хар тэнгисийн сав газарт болсон үйл явдлын дараа таагүй байгаагаа илэрхийлж украин улс “Оросын нутгийн гүнд цохилт өгөх чадалтай” зэвсэг бүтээх ёстой гэж байсан юм.