Алан хядагч “Лалын улс” зэвсэгт бүлэглэлийн удирдагч байгаад саяхан америкийн тусгай ажиллагааны үеэр амь алдсан Абу Бакра аль-Багдадийн эгчийг туркийн хүчнийхэн Сирийн умард нутгаас саатууллаа гэж туркийн өндөр албаны хүнээс авсан мэдээллээ Reuters агентлаг дамжуулсныг Associated Press агентлагч бас баталсан байна. 

Алан хядагчийн эгч 65 настай Расмию Авадыг Азаз хотоос холгүй өөрийн гэр бүлтэйгээ амьдардаг ачааны чиргүүл чингэлэгт байхад нь саатуулжээ. Баривчилгааны үеэр тэрээр нөхөр, бэр, таван хүүхэдтэйгээ хамт байсан гэнэ.

“Аль-Багдадийн эгчээс бид Лалын улс зэвсэгт бүлэглэлийн дотоод ажлын талаар үнэтэй мэдэлэл олж авна гэж найдаж байна. Одоо түүнийг байцааж байгаа” гэж мэдээлэл өгсөн түшмэл хэлжээ. Тэр бас “энэ бол тагнуулынхны хувьд алт шиг олз” гээд түүнээс авсан мэдүүлэг нь террорист бүлэглэлийн тухай мэдээллийг улам баяжуулна гэсэн байна.

“Лалын улс” зэвсэгт бүлэглэлийн толгойлогч аль-Багдадиг устгасан тухайгаа АНУ-ын Ерөнхийлөгч Дональд Трамп аравдугаар сарын 27-нд зарласан. Түүний мэдэгдсэнээр бол Сири дэх Америкийн цэргийнхэн зэвсэгт бүлэглэлийн толгойлогчийг гарах гарцгүй хонгилд оруулснаар тэр өөрийгөө дэлбэлж амиа золиосолсон гэнэ. Түүнтэй хамт түүний гурван хүүхэд амь үрэгджээ. “Лалын улс” зэвсэгт бүлэглэл ч энэ мэдээллийг баталсан юм.

Одоо алан хядагч “Лалын улс” зэвсэгт бүлэглэлийн шинэ удирдагчаар Абу Ибрахим аль-Хашеми аль-Кураши гэгч тодорчээ.
Харин Сирийн Ерөнхийлөгч Башар Асад болохоор “Лалын улс” зэвсэгт бүлэглэлийн удирдагчийн үхсэн гэдэгт итгэх хэрэггүй, одоохондоо түүний үхсэнийг нотлох баримт алга гэж байгаа юм. Оросын Батлан хамгаалах яам ч бас алан хядагчийг америкийн ажиллагааны үеэр устгасан гэсэн нотлох баримт байхгүй гэж байгаа юм.