Хятадаас импортолж байгаа бараанд нэмэлт татвар ногдуулсан нь хоёр орны эдийн засагт адил хохирол учруулсан гэж НҮБ-ын Худалдаа хөгжлийн Бага хурлын (ЮНКТАД) илтгэлд тэмдэглэсэн байна. Үүний хамгийн их хохирогчид нь өмнө авч байсан бараа бүтээгдэхүүнээ илүү өндөр үнээр худалдан авах болсон америкийн хэрэглэгчид гэжээ. 2019 оны эхний хагаст л гэхэд Америкийн татвар хятадын эдийн засагт 35 тэрбум ам.долларын хохирол учруулсан юм. Нөгөө талд нь импортын ийм нэмэлт татвар ногдуулснаар Хятадаас орж ирэх бараа 25 хувь буурсан. Хятадын барааны энэ орон зайг Тайвань, Мексик, Европын холбоо, Вьетнам болон бусад орнууд эзэлсэн. Харин сүүлийн үед Хятад экспортын үнээ буулгаж байгааг ЮНКТАД тэмдэглэжээ. Аравдугаар сарын дундуур болсон Вашингтон, Бээжингийн худалдааны хэлэлцээрийн шинэ шатаар худалдааны дайнаа энхтайвнаар зохицуулахаа зарласан. Америкийн тал Хятадын бараанд дахиад нэмэлт татвар ногдуулахаа хойшлуулахаа амласан бол Хятад АНУ-аас хүнсний бүтээгдэхүүн авахаа хоёр дахин нэмэгдүүлнэ гэсэн юм.