Уур амьсгалын талаарх Парисын хэлэлцээрт оролцохоо зогсоох үйл явцаа АНУ даваа гарагаас эхлүүлж байгаа талаар америкийн Төрийн нарийн бичгийн дарга Майк Помпео твиттертээ бичсэн байна. “Агаар мандалд хорт хаягдал гаргахаа хорогдуулах, хүрээлэн байгаа орчныг бохирдуулахтай тэмцэх чадварыг бэхжүүлэх, эдийн засгаа өсгөх, ард иргэдээ эрчим хүчээр хангах талаар АНУ дэлхийд тэргүүлж байгаагаараа бахархаж байна” гэж тэр тэмдэглэсэн байна.
Уур амьсгалын талаарх хэлэлцээрээс гарахаа АНУ бүр 2017 онд зарлаж олон улсын хамтын нийгэмлэгийн шүүмжлэлд өртөж байсан юм. Парисын энэ хэлэлцээрээр АНУ 2025 он гэхэд хүлэмжийн хий ялгаруулалтаа 2005 оныхоос 26-28 хувь бууруулах үүрэг хүлээсэн юм.

Уур амьсгалын талаарх Парисын хэлэлцээрээс АНУ-ын гарах үйл явцаа эхлүүлснийг ХБНГУ-ын Эдийн засгийн хамтын ажиллагаа, хөгжлийн сайд Герд Мюллер ухрах алхам хэмээн нэрлэсэн байна. АНУ-ын Төрийн нарийн бичгийн дарга Майк Помпеогийн мэдэгдсэнээр бол энэ үйл явцыг эхлүүлснээс яг нэг жилийн дараа АНУ энэ хэлэлцээрээс гарах юм байна.
“Парисын хэлэлцээрээс хэлбэрийн төдий ч болов гарч байгаа нь нүүрс хүчлийн хий ялгаруулалтаараа хоёрт ордог энэ орон уур амьсгалыг хамгаалах олон улсын хүчин чармайлтаас алхам ухарч байгаа хэрэг. Уур амьсгалын өөрчлөлтөд ихээхэн хувь нэмэр оруулж байгаа үйлдвэрлэгч орны хувьд онцгой хариуцлага хүлээж, өөртөө тэргүүлэх үүрэг үүрэх ёстой” гэж Германы сайдын хэлснийг хэвлэлийн алба нь эш татан дамжуулжээ.
Харин холбооны муж, хот, тойрог, тэр бүү хэл албан байгууллагууд нь Парисын хэлэлцээрийн зорилтыг хэрэгжүүлэхийн төлөө ажиллаж байгааг германы сайд сайшаагаад ганцхан АНУ энэ талаар бүхэлдээ тун удаан урагшилж байна, зөвхөн долоон муж л хэлэлцээрийн биелүүлж байгаа гэжээ. АНУ-ын 10 муж, 287 хот “бид үлдэнэ” санаачилгад нэгдэн холбооны шийдвэрээс үл хамааран Парисын хэлэлцээрийг биелүүлэхийн төлөө ажиллана гэдгээ илэрхийлээд байгаа юм байна.

“Уур амьсгалын өөрчлөлтөөс болоод хөгжингүй орны ард иргэд хэлмэгдэж байна шү дээ” гэж Герд Мюллер онцолжээ.
Уур амьсгалын өөрчлөлтийн аюулыг багасгах зорилготой Парисын энэ хэлэлцээрийг 2015 оны арванхоёрдугаар сарын 12-нд манай гаргийн 175 орон баталж, 2016 оны арваннэгдүгээр сарын 4-нөөс хүчин төгөлдөр болсон юм. Энэ хэлэлцээр уур амьсгалын өөрчлөлтийн асуудалд дэлхийн томоохон бүх орныг нэгтгэж чадсан юм.
Парисын энэ хэлэлцээрээс өмнө хөгжингүй хэд хэдэн орны хувьд хүлэмжийг хий ялгаруулах хэмжээнд нь квот тогтоосон Киотогийн протокол 1997 оноос хэрэгжиж байсан юм. Гэтэл бас л АНУ энэ протколоос гарсан бол бусад орнууд ч хүлээсэн үүргээ биелүүлээгүй өнгөрсөн байдаг.
Өнөөдөр Уур амьсгалын талаарх Парисын хэлэлцээрт 197 орон оролцож байгаагийн 185 нь энэ хэлэлцээрийг батлаад байгаа юм.