АНУ-ын Ерөнхийлөгч Дональд Трамп Туркийн Ерөнхийлөгч Режеп Тайип Эрдогантай утсаар ярьж, Сирийн умард нутгийн нөхцөл байдал, ялангуяа “Лалын улс” зэвсэгт бүлэглэлийн дайчдыг барьсан талаар санал солилцсоноо өөрийнхөө Twitter хуудсанд “маш сайхан яриа болсон” гэж бичсэн байна.
“Туркийн Ерөнхийлөгчтэй утсаар ярьсан минь миний хувьд маш сайн яриа боллоо. Тэр туркийн цэргийн ажиллагааны үеэр оргосон “лалын улс” зэвсэгт бүлэглэлийн дайчдыг, мөн алан хядагчдын толгойлогч аль-Багдадигийн эгч, эхнэрийг туркийн цэргийнхэн баривчилсан гэж мэдээлсэн” гэж Д.Трамп бичжээ.
Туркийн Ерөнхийлөгчийн Тамгын газрын мэдээлэлд арваннэгдүгээр сарын 13-нд Вашингтонд хоёр орны тэргүүний уулзалт болно гэж байгаа ч Эрдоган АНУ-д айлчлах эсэхээ одоохондоо шийдээгүй байна, Д.Трамптай утсаар ярьсныхаа дараа шийднэ гэжээ.
Сирид туркийн явуулж байгаа байлдааны ажиллагааг 120 цагийн дотор зогсоож Турк, Сирийн хил дагуу 30 км-ийн хамгаалалтын бүс гарган курдуудыг энэ бүсээс гаргаж тэр нутгийг Анкара дангаараа хянаж болно хэмээн АНУ, Турк хоёр улс аравдугаар сарын 17-нд тохиролцсоноо мэдэгдсэн. Гал зогсоох энэ хугацаа аравдугаар сарын 22-нд дууссан билээ. Эрдоган ч энэ талаар АНУ-ыг Туркийн өмнө хүлээсэн үүргээ бүрэн биелүүлсэн хэмээн мэдэгдсэн юм.