Хүлээн зөвшөөрөгдөөгүй Нагорный Карабахын бүгд найрамдах улсын төлөөлөгчид Москвад айлчилсантай холбогдуулан ОХУ-аас Азербайжанд суугаа Элчин сайд Михаил Бочарниковт тус улсын Гадаад хэргийн яам эсэргүүцлийн нот бичиг гардууллаа хэмээн Азербайжаны Гадаад хэргийн яамны хэвлэлийн алба мэдээлсэн байна.
Харин оросын Элчин сайд Бочарников энэ сөргөлдөөний талаарх ОХУ-ын байр суурь тодорхой, өөрчлөгдөх ч үгүй гэсэн байна. Азербайжаны Гадаад хэргийн яам Нагорный-Карабахын төлөөлөгчид Москвад айлчилж байгаа нь манай улсын газар нутгийн бүрэн бүтэн байдлын эсрэг чиглэсэн өдөөн хатгасан шинж агуулж байна гэснийг ТАСС агентлаг мэдээлжээ.
Нагорный Карабах нь Азербайжан, Армяны хооронд Өвөр Кавказад оршдог засаг захиргааны жижиг нэгж. Энэ бүс нутаг азербайжан, армяны хооронд угсаатны сөргөлдөөн үүсэх гол шалтгаан болдог юм. ЗХУ тарсны дараагаар энд зэвсэгт мөргөлдөөн гарч эхэлсэн ч Азербайжан, Армяны 1994 оны тавдугаар сарын 12-ны хэлэлцээрээр гал зогсоосон. Гэтэл 2016 оны дөрөвдүгээр сараас нөхцөл байдал дахин хурцдаж Азербайжан нь армяны талаас буудлаа гэсэн бол Армян нь азербайжаны зүгээс дайрлаа гэж мэдэгдсэн.
Ногорный Карабахын асуудлаар шууд яриа хэлэлцээрээ үргэлжлүүлье хэмээн Армяны Ерөнхий сайд Никол Пашинян, Азербайжаны Ерөнхийлөгч Ильхам Алиев нар гуравдугаар сарын 28-нд тохиролцоод байгаа юм.