Сирийн Кобани нутгийн иргэд орос-туркийн цэргийн эргүүлийг чулуу шидэж угтлаа гэж мэдээллийн North Press Agency мэдээллээ. Хэвлэлд бичсэнээр бол иргэд энэ ажиллагаанд дургүй байгаагаа илэрхийлэхийн тулд хамтарсан эргүүлийн явах замыг зориуд тосч ийнхүү эсэргүүцлээ илэрхийлсэн байна. Reuters агентлагийн мэдээлснээр бол тосгоны иргэд оросын цэргийн цагдаагийн эргүүлийн хуягт машинуудыг зогсоож, дээр нь авирч гарахыг оролдсон байна.
Орос, Турк хоёр арваннэгдүгээр сарын 5-нд Сирийн зүүн хойд нутагт Кобани суурингаас 160 км газарт хоёр дахь хамтарсан эргүүл хийж эхэлсэн юм. Эргүүлийн энэ ажиллагаанд оросын хуягласан “Тигр” машин, туркийн Kirpi хуягт машин зэрэг 50 нэгж техник оролцож байгаа юм.
Орос-туркийн хамтарсан эргүүл хамгийн анх арваннэгдүгээр сарын 1-нээс эхэлж цэргийн цагдаагийнхан курдуудийн эсрэг туркийн байлдааны ажиллагаа явуулсан баруун, зүүн бүсэд эргүүл хийсэн юм.
ОХУ, Туркийн Ерөнхийлөгч Владимир Путин, Режеп Тайип Эрдоган нар аравдугаар сарын 22-нд зургаан цагийн хэлэлцээр хийж сири-туркийн хилийн районд сирийн цэргийнхэн, оросын цэргийн цагдаагийн хамтарсан эргүүл хийхээр тохирсон юм.
ОХУ-ын Гадаад хэргийн сайд Сергей Лавров бас Сирийн умард нутаг дахь Туркийн цэргийн “Энхтайвны эх булаг” ажиллагаа зогссоныг мэдэгдээд байна.