Холливудын жүжигчин 64 жилийн өмнө авто ослоор амь алдсан Жеймс Дин “Жекийн эрэлд” гэдэг киноны бүрэлдэхүүнд орж, компьютер графикийн тусламжтайгаар бүтээсэн төрхөөрөө “тоглож” байгаа гэнэ. Зохиолч Гарет Крокерийн романаар бүтээсэн Вьетнам дахь дайны сүүлчээр тэнд орхигдсон цэргийн хэдэн мянган нохойны тухай эл киноны Роганы дүрд талийгаач жүжигчин “тоглож” байгаа юм байна. Киноны зургийг энэ намар авч эхлэн, ирэх 2020 оны намар дэлгэцэнд гаргахаар төлөвлөжээ. Жеймс Динийг бүтээх ажлыг VFX Imagine Engine, VFX MOI Worldwide гэсэн хоёр студид гүйцэтгэж бүхий л биеийг нь компьютер дээр сэргээн “тоглуулаад” дууг нь өөр жүжигчин оруулах юм байна. Диний дүрийг ашиглах эрхийг кино компани түүний гэр бүлийнхнээс нь худалдаж авчээ. Энэ киноны найруулагч Антон Эрнст “бид Роганы дүрд тоглочих жүжигчнийг удаан хайгаад эцэст нь Жеймс Дин дээр л тогтсон” гэж ярьжээ. Бүрэн хэмжээний гурван ч кинонд амжилттай тоглоод байсан Жеймс Дин 1955 онд 24 насандаа авто ослоор амь үрэгдсэн юм. Үзэгчид түүнийг “Аварга эр”, “Диваажингаас зүүн зүгт” гэдэг киноных нь дүрээр сайн мэддэг юм. Нас барсны нь дараа түүнийг энэ дүрээр нь “Оскар”-ын шагналд нэр дэвшүүлж байсан юм байна.