Украины Ерөнхийлөгч Владимир Зеленский сонгуулийн өмнөх амлалтаа биелүүлээгүй учраас тус улсын Засгийн газар, мөн парламент хугацаанаасаа өмнө үйл ажиллагаагаа зогсоох ёстой гэж “Хөгжлийн үндэсний стратеги” хөдөлгөөний удирдагч Дмитрий Спивак санал болгож байна. Түүнийхээр бол В.Зеленский сонгуулийн өмнө авлигачдад хариуцлага тооцно, хууль бүх нийтэд тэгш үйлчилнэ, цагаачлан гадаад руу дүрвэсэн украинчуудыг эх оронд нь эргүүлэн авчрах боломж бүрдүүлнэ гэсэн ч энэ бүхэн хэрэгжээгүй гэжээ.
Энэ бүхий л амлалтаа биелүүлээгүй болохоор өнөөгийн засгийн газар бүрэлдэхүүнээрээ үйл ажиллагаагаа зогсоож, Дээд Радагийн ээлжит бус сонгуулийг 2020 оны намар юм уу, 2021 оны хавар явуулах хэрэгтэй гэнэ. “Би ингэж харж байна. Энэ Засгийн газрыг хоёрдугаар сар гэхэд эх орноосоо хөөх хэрэгтэй. Зун гэхэд парламентыг зайлуулах болно” гэж Дмитрий Спивак “NewsOne” телевизээр ярихдаа мэдэгдээд ингэж байж л  Украины хөгжлийн шинэ үе шат эхэлнэ гэсэн байна. Үүний өмнө арваннэгдүгээр сарын 2-нд Дээд Рада Ерөнхийлөгч Владимир Зеленскийн  гадаад бодлого сүйрлээ гэж мэдэгдсэн юм.