Болив улсад ажиллаж байгаа төрийн албан хаагчид, тэдний гэр бүлийнхнийг тус улсаас гарч явахыг АНУ-ын Төрийн департамент анхааруулсан байна. Энд онцгой үүрэг гүйцэтгэж байгаагаас бусад мэргэжилтнүүдийг дурджээ. Боливт улс төрийн тогтворгүй байдал үүссэнтэй холбогдуулан ийм шийдвэр гаргахад хүрлээ гэж АНУ-ын Төрийн департаментын мягмар гарагт тараасан мэдэгдэлд өгүүлсэн байна. Үүний зэрэгцээ америкчуудын зорчиж болохгүй орны жагсаалтад Боливыг оруулсан байна. “Иргэний эмх замбараагүй байдал үүссэнтэй холбогдуулан Боливыг зорихгүй байхыг анхааруулж байна” гэж баримт бичигт дурдсаныг ТАСС эш татжээ.
Болив улсад болсон Ерөнхийлөгчийн сонгуулийн дараа дахин сонгогдсон Эво Моралесийг эсэргүүцсэн хөдөлгөөн улс орон даяар өрнөж сүүлдээ эмх замбараагүй байдал болон хувирсан юм. Ерөнхийлөгч Эво Моралес албан тушаалаасаа огцорч Мексик рүү дүрвэсэн ч эсэргүүцлийн хөдөлгөөн эмх замбараагүй байдал төгсөхгүй үргэлжилсээр байна.