Үл мэдэгдэх хэсэг хүн Бразиль дахь Венесуэлийн Элчин сайдын яамыг эзлэхийг оролдлоо хэмээн Боливарын бүгд найрамдах улсын Гадаад хэргийн дэд сайд Иван Хиль мэдээлсэн байна. “Хэн нь мэдэгдэхгүй хүмүүс Бразиль дахь манай Элчин сайдын яамны байранд дайран оржээ. Бразилийн Засгийн газар олон улсын конвенцыг хүндэтгэж, манай дипломатуудын аюулгүй байдлыг хангах баталгаа өгөх ёстой. Хүчирхийллийг зогсоохгүй бол энэ нь ноцтой үйлдэл болно” гэж венесуэлийн дипломат тэмдэглэсэн байна.
Бразилийн Засгийн газар энэ сарын 13-14-нд болох БРИКС-ийн дээд хэмжээний уулзалтад Орос, Энэтхэг, Хятад, Өмнөд Африкийн бүгд найрамдах улсыг уриад Венесуэлийн ерөнхийлөгч Николас Мадурог дэмжихээс татгалзаж, тус улсын хууль ёсны тэргүүн нь сөрөг хүчний удирдагч Хуан Гуайдо гэсэн юм. Хуан Гуайдо хэдэн сарын өмнө өөрийгөө Венесуэлийн ерөнхийлөгч хэмээн зарлаж, засгийн эрхийг булаан авахыг оролдсон юм.
Улмаар улс оронд бүх нийтийн эсэргүүцлийн хөдөлгөөн өрнөж, эдийн засгийн хямрал нүүрлээд байна. АНУ-ын зүгээс Каракасын эсрэг эдийн засгийн хориг тавьсан нь нөхцөл байдлыг улам дордуулж байгаа юм. Саявтар Вашингтон венесуэлийн эсрэг хоригийн жагсаалтаа улам өргөтгөх шийдвэр гаргасан. Санхүү зээлийн хязгаарлалтдаа венесуэлийн өндөр албаны таван хүний нэрийг нэмж оруулсан юм.