Боливт газар сайгүй өрнөж үргэлжилсээр байгаа эсэргүүцлийн хөдөлгөөнийг дарахын тулд цэрэг арми, цагдаагийн хүч хэрэглэж байгаагаас нөхцөл байдал хяналтаас гарч магадгүй байна хэмээн НҮБ-ын Хүний эрхийн асуудал хариуцсан дээд комиссар  Мишель Бачелет баасан гарагт энд таван хүн амь алдсантай холбогдуулан мэдэгдсэн байна. “Эсэргүүцлийн хөдөлгөөний улмаас 17 хүн амь үрэгдсэний 14 нь л гэхэд зөвхөн сүүлийн зургаан өдөрт амь алдсан гэсэн   мэдээлэл бидэнд байна. Эхлээд эсэргүүцлийн хөдөлгөөнд оролцогсдын өөр хоорондын мөргөлдөөнөөс болж хүмүүс амь үрэгдэж байсан бол сүүлийн золиосууд цагдаа цэргийнхэн шаардлагагүй үед хүч хэрэглэснээс болсон байна. Энэ бол хүч хэрэглэх төдийгүй, энэ явдлыг газар авхуулж мэдэх онцгой аюултай явдал” гэж хатагтай Мишель Бачелет хэлсэн байна.
Тэрбээр “Хэрвээ Засгийн газар нь олон улсын хэм хэмжээ баримтлан алдаагаа засахгүй бол Боливын нөхцөл байдал хяналтаас гарч мэдэхээр байна” хэмээн түгшиж байгаагаа мэдэгджээ. “Улс орон нь талцаад, улс төрийн хоёр тал болон хуваагдсан хүмүүс аль аль нь бухимдалтай байна. Ийм нөхцөлд эрх баригчид, Засгийн газрын зүгээс хэлмэгдүүлэл явуулаад эхэлбэл гал дээр тос нэмсэн адил болж үйл явдлыг улам дэвэргэн, яриа хэлэлцээ хийх, зөвшилцөх замыг бүр хаана” гэж  НҮБ-ын Хүний эрхийн асуудал хариуцсан дээд комиссар хэлж байна. Тэр бас Боливт эсэргүүцлийн хөдөлгөөнд оролцогчдыг олноор нь баривчилж байгаа нь шинэ сөргөлдөөн, мөргөлдөөн дагуулж магадгүй хэмээн анхааруулжээ. Үүнтэй холбогдуулан Хүний эрхийн дээд комиссар Боливын эрх баригчдад хандан баривчлагдсан, шархтаж гэмтсэн, амь үрэгдсэн хүний тоог ил болгон дэлгэх, хүний эрхийг зөрчсөн тохиолдлуудыг ил тод мөрдөн шалгах,  жагсаал цуглаан тараахын тулд цэргийнхнийг ашиглахаа зогсоохыг уриалсан байна.