Оросын батлан хамгаалахын нисгэгчгүй “Орион” аппарат Рязань мужийн Листвянка тосгоны ойролцоо осолдож уналаа гэж Москвагийн Тээврийн хэргийн мөрдөн байцаах газрын онцгой хэргийн мөрдөн байцаагч Сергей Бубенев ТАСС агентлагт мэдээлсэн байна. Рязань районы захирагч Наталья Жуняева энэ талаар аппарат орон сууцны байшингаас 70 метрийн зайд унасан, ямар ч хор уршиг учраагүй гэж мэдээлжээ. Нүдээр үзсэн хүмүүсийн хэлж байгаагаар бол аппарат унахдаа нарс моддын оройг шүргэн тайрч хугалсан гэнэ.
Нисгэгчгүй “Орион” аппарат нь 200 кг жинтэй, алсын нислэгийн зориулалттай дундын өндөрт нисдэг аппарат. “Туршилтын загварыг турших явцад техникийн доголдол гарсны улмаас осол гарсан байна” гэж Сергей Бубенев хэлсэн байна. Аппаратыг зохион бүтээсэн Кронштадт компани мөрдөн шалгах ажиллагаанд туслахаа амлажээ. Гэхдээ энэ осол Батлан хамгаалах яамны захиалгаар энэ он дуустал хийх туршилтын ажилд садаа болохгүй гэж цэргийн эх сурвалж мэдэгдсэн байна.