БНАСАУ-ын удирдагч Ким Чен Ун цэргийн нисэх хүчин, агаараас эсэргүүцэн хамгаалах салбарын хамтарсан хээрийн сургуулийг очиж үзлээ хэмээн Умард Солонгосын мэдээллийн төв агентлаг ЦТАК арваннэгдүгээр сарын 16-нд мэдээллээ. Умард Солонгос энэ удаагийн ийм сургуулилтаа цэргийн нисэх хүчний салбар, пуужингаас хамгаалах хүчний салааны хооронд тэмцээний хэлбэрээр зохион байгуулсан байна. Сургуулилтын эцэст удирдагч Ким Чен Ун “ялагдашгүй” хүчин чадлаа харуулж чадсан зуны корпусын нисгэгчдийн ур чадварыг өндрөөр үнэлжээ.
Нисгэгчид шүдээ хүртэл зэвсэглэсэн дайсантай ямар ч нөхцөлд тулалдахад аугаа их үзэл санаа, тактикийн хувьд бэлэн байх ёстой гэдгийг тэмдэглээд цэргийн хүн дайсныг ялахад зэвсэг техникийн давуу тал биш үзэл санааны хувьд давуу байх нь чухал гэсэн байна. “Дайснууд  хэзээ ч манай цэргийнхэн шиг улс төр, үзэл суртлын бэлтгэл, дайчин ёс суртахуунтай байж чадахгүй” гэж Ким Чен Ун хэлжээ.
Аравдугаар сарын 31-нд Умард Солонгос Пенан-Намогийн районоос пуужин харвалаа гэж Өмнөд Солонгосын хэвлэлүүд мэдээлсэн юм. Үүний өмнө аравдугаар сарын 2-нд БНАСАУ-ын харвасан хоёр пуужингийн нэг нь Японы эдийн засгийн бүсэд унаж японы засгийн газар Пеньянд хандаж эсэргүүцлээ илэрхийлж байсан юм.