АНУ-ын Ерөнхийлөгч Дональд Трамп Умард Солонгосын удирдагч Ким Чен Унд хандаж Солонгосын хойгийг цөмийн зэвсэггүй бүс болгох тухай яриа тохиролцоонд хүрэхийг уриалаад тун удахгүй уулзана гэж амлалаа. “Ноён дарга аа, яриа хэлэлцээгээ түргэн дуусгахыг уриалж байна, Удахгүй уулзана” гэж Д.Трамп ням гарагт твиттертээ бичжээ.
Д.Трамп бас БНАСАУ-ын мэдээллийн төв агентлаг ЦТАК-ийн саяхан өөрийн нь өрсөлдөгч, Ардчилсан намын Жо Байденыг “хэдэр нохой” хэмээн нэрлэсэнд тайлбар өгсөн байна. Д.Трамп “Жо Байден нойрмог, маш гацаа байж болно, гэхдээ тэр “хэдэр нохой” биш. Тэр үүнээс арай дээр, гэхдээ та нарын хаана байх ёстойг зааж өгч чадах цор ганц хүн” гэж бичсэн байна.
БНАСАУ-ын асуудал хариуцсан АНУ-ын тусгай төлөөлөгч Стивен Биган АНУ, БНАСАУ-ын хэлэлцээрийг арванхоёрдугаар сард хийе гэсэн санал тавилаа гэж БНАСАУ-ын Гадаад хэргийн сайд Ким Мён Гиль үүний өмнө мэдээлж байсан юм. Өмнөд Солонгосын Үндэсний тагнуулын агентлаг NIS чбас АНУ-БНАСАУ-ын дээд хэмжээний уулзалт, ажлын хэлэлцээр арванхоёрдугаар сард болно гэж мэдээлсэн.
Шведэд болсон ажлын хэлэлцээрийн үеэр АНУ-ын төлөөлөгчдийг “гар хоосон” ирлээ хэмээн Умард Солонгосын төлөөлөгчид уулзалтыг орхин гарснаас хойш Солонгосын хойгийг цөмийн зэвсэггүй болгох тухай АНУ-БНАСАУ-ын хоорондох хэлэлцээр тасалдаж гацаанд ороод байгаа юм. Харин Америкийн тал хэлэлцээрийг “шинэ санаагаар баяжсан” сайн хэлэлцээр гэж нэрлээд байна. Үүний дараа БНАСАУ цөмийн зэвсэггүй болгох асуудлаар АНУ “шинэ шийдэл” гаргаж, БНАСАУ-д оны эцэс хүртэл аюулгүй байдлын баталгаа гаргаж өгөх ёстой, эс тэгвэл хэлэлцээр тасалдана гэж нэг бус удаа мэдэгдээд байгаа юм.